mera wajud hai ek naqsh-e-ab ki surat

mirā vajūd hai ik naqsh-e-āb kī sūrat

shikast jis kā muqaddar hai ḳhvāb kī sūrat

bikhar na jā.ūñ fazā meñ varaq varaq ho kar

havā kī zad meñ huuñ kohna kitāb kī sūrat

tanāv had se baḌhegā to TuuT jā.eñge

diloñ ke rābte tār-e-rabāb kī sūrat

kisī bhī lamhe nikal jā.ūñgā havā kī tarah

mirā badan hai hisār-e-habāb kī sūrat

darūn-e-sīna koī chīḳhtā hai shām-o-sahar

ye qahqahe to haiñ ruḳh par naqāb kī sūrat

ġhurūr-e-vaqt se nashsha huā sivā 'sābir'

mirī anā thī purānī sharāb kī sūrat

mera wajud hai ek naqsh-e-ab ki surat

shikast jis ka muqaddar hai KHwab ki surat

bikhar na jaun faza mein waraq waraq ho kar

hawa ki zad mein hun kohna kitab ki surat

tanaw had se baDhega to TuT jaenge

dilon ke rabte tar-e-rabab ki surat

kisi bhi lamhe nikal jaunga hawa ki tarah

mera badan hai hisar-e-habab ki surat

darun-e-sina koi chiKHta hai sham-o-sahar

ye qahqahe to hain ruKH par naqab ki surat

ghurur-e-waqt se nashsha hua siwa 'sabir'

meri ana thi purani sharab ki surat