mera wajud hai kya zarra-e-fuzul hun main

mirā vajūd hai kyā zarra-e-fuzūl huuñ maiñ

ye kam nahīñ hai ki us rāste kī dhuul huuñ maiñ

vo din bhī the ki maiñ ik sāya-dār bargad thā

ye rut bhī aa.ī ki ik ḳhushk sā babūl huuñ maiñ

badal rahī haiñ har ik pal hayāt kī qadreñ

aur aise daur meñ ik mard-e-bā-e-usūl huuñ maiñ

maiñ kyā batā.ūñ ki ḳhud mujh ko bhī nahīñ ma.alūm

ye kaisā ġham hai mujhe kis liye malūl huuñ maiñ

na pā sakegā koī 'najm' rang-o-bū mujh meñ

hazār baar jo maslā gayā vo phuul huuñ maiñ

mera wajud hai kya zarra-e-fuzul hun main

ye kam nahin hai ki us raste ki dhul hun main

wo din bhi the ki main ek saya-dar bargad tha

ye rut bhi aai ki ek KHushk sa babul hun main

badal rahi hain har ek pal hayat ki qadren

aur aise daur mein ek mard-e-ba-e-usul hun main

main kya bataun ki KHud mujh ko bhi nahin malum

ye kaisa gham hai mujhe kis liye malul hun main

na pa sakega koi 'najm' rang-o-bu mujh mein

hazar bar jo masla gaya wo phul hun main