mera wujud nahin hai faqat jahan ke liye

mirā vujūd nahīñ hai faqat jahāñ ke liye

mujhe ḳhudā ne banāyā hai lā-makāñ ke liye

mirā vujūd zamīñ kī hadoñ talak hī nahīñ

mirā safar to musalsal hai do-jahāñ ke liye

ye mere tajrabe hī manziloñ ke rahbar haiñ

maiñ sochtā hī nahīñ mīr-e-kārvāñ ke liye

havā-e-garm ne shāḳheñ tabāh kar Dālīñ

lagā.e the jo shajar ham ne sā.ebāñ ke liye

uḌā diye haiñ na jaane kahāñ havā ne sab

jo tinke chun liye the maiñ ne āshiyāñ ke liye

zamāne ke liye rahbar se kam nahīñ hai tū

tirā vujūd nahīñ hai faqat fuġhāñ ke liye

visāl-e-yār kī ḳhvāhish meñ dil taḌaptā hai

zamīn jaise taḌaptī hai āsmāñ ke liye

mirī hayāt to kuchh bhī nahīñ tumhāre baġhair

tumhārā 'ishq zarūrī hai qalb-o-jāñ ke liye

ye rang-o-bū ye gulistāñ ye ḳhushnumā manzar

tumhārā husn hī kaafī hai dāstāñ ke liye

maiñ is jahāñ meñ huuñ lekin phir ik jahāñ hai aur

ye zindagī hai haqīqat meñ us jahāñ ke liye

tū rang-o-bū ke nazāroñ meñ kho na jā 'ash.har'

ye rang-o-bū haiñ faqat tere imtihāñ ke liye

mera wujud nahin hai faqat jahan ke liye

mujhe KHuda ne banaya hai la-makan ke liye

mera wujud zamin ki hadon talak hi nahin

mera safar to musalsal hai do-jahan ke liye

ye mere tajrabe hi manzilon ke rahbar hain

main sochta hi nahin mir-e-karwan ke liye

hawa-e-garm ne shaKHen tabah kar Dalin

lagae the jo shajar hum ne saeban ke liye

uDa diye hain na jaane kahan hawa ne sab

jo tinke chun liye the main ne aashiyan ke liye

zamane ke liye rahbar se kam nahin hai tu

tera wujud nahin hai faqat fughan ke liye

visal-e-yar ki KHwahish mein dil taDapta hai

zamin jaise taDapti hai aasman ke liye

meri hayat to kuchh bhi nahin tumhaare baghair

tumhaara 'ishq zaruri hai qalb-o-jaan ke liye

ye rang-o-bu ye gulistan ye KHushnuma manzar

tumhaara husn hi kafi hai dastan ke liye

main is jahan mein hun lekin phir ek jahan hai aur

ye zindagi hai haqiqat mein us jahan ke liye

tu rang-o-bu ke nazaron mein kho na ja 'ashhar'

ye rang-o-bu hain faqat tere imtihan ke liye