mera ye zaKHm sine ka kahin bharta hai sine se

mirā ye zaḳhm siine kā kahīñ bhartā hai siine se

lagā.e ai sanam jab tak na tū siine ko siine se

falak ne shādmāñ dekhā jise aayā usī ke sar

ḳhudā mahfūz har insāñ ko rakkhe is kamīne se

jo le jaate haiñ dil merā bachānā Thes se us ko

vo hai ai sang-dil nāzuk ziyāda ābgīne se

na hogī duur ġhash merī gulāb-o-mushk-o-ambar se

mire ruḳh ko tū dho ai gul-badan apne pasīne se

kahīñ ye saaf hotā hai kudūrat aur kiine se

agar zaḳhm-e-jigar mil bhī gayā dushman ke siine se

dil ik dahne rahā gar dūsrā daa.im rahā baa.eñ

na do bāham hue dil go milā siina bhī siine se

koī ranj-o-alam aa.e na dil ke paas ai saaqī

jo ho āġhāz-e-mai-noshī moharram ke mahīne se

tū chāhe dūsroñ ko aur ham marte phireñ tujh par

hamāre vāste marnā hai behtar aise jiine se

samajhnā chāhiye kiine se siina hai bharā us kā

kiyā hai 'mashriqī' inkār jis ne mai ke piine se

mera ye zaKHm sine ka kahin bharta hai sine se

lagae ai sanam jab tak na tu sine ko sine se

falak ne shadman dekha jise aaya usi ke sar

KHuda mahfuz har insan ko rakkhe is kamine se

jo le jate hain dil mera bachana Thes se us ko

wo hai ai sang-dil nazuk ziyaada aabgine se

na hogi dur ghash meri gulab-o-mushk-o-ambar se

mere ruKH ko tu dho ai gul-badan apne pasine se

kahin ye saf hota hai kudurat aur kine se

agar zaKHm-e-jigar mil bhi gaya dushman ke sine se

dil ek dahne raha gar dusra daim raha baen

na do baham hue dil go mila sina bhi sine se

koi ranj-o-alam aae na dil ke pas ai saqi

jo ho aaghaz-e-mai-noshi moharram ke mahine se

tu chahe dusron ko aur hum marte phiren tujh par

hamare waste marna hai behtar aise jine se

samajhna chahiye kine se sina hai bhara us ka

kiya hai 'mashriqi' inkar jis ne mai ke pine se