mere aage wo surat aa rahi hai

mire aage vo sūrat aa rahī hai

nigāh-e-ārzū tharrā rahī hai

sadā-e-zindagī ye aa rahī hai

tamanna āzmā.ī jā rahī hai

tavajjoh se suno tum naġhma-e-ishq

hamārī aarzū kuchh gā rahī hai

zarā sahrā-navardī kījiye phir

hameñ vahshat yahī samjhā rahī hai

ilāhī ho dil-e-betāb kī ḳhair

kisī kī yaad phir taḌpā rahī hai

baḌhā jaatā hai darmāñ se mirā dard

sadā-e-dil ye paiham aa rahī hai

ruḳh-e-rangīñ kisī kā hai nazar meñ

bahār-e-zindagī itrā rahī hai

mashiyyat naam hai tāqat kā shāyad

abas ġhairat tirī sharmā rahī hai

tasavvur aur phir lutf-e-tasavvur

hameñ to niiñd is se aa rahī hai

nigāh-e-nāz ko jumbish to phir do

na jaane kyoñ adā ye bhā rahī hai

hayāt-o-maut kī is kashmakash ko

ajal bhī dekh kar ghabrā rahī hai

sunā.ūñ dāstān-e-zindagī kyā

musībat par musībat aa rahī hai

sañbhal jaa.e tabī.at ġhair mumkin

tamanna kyoñ ise bahlā rahī hai

mubārak ho naved-e-marg tum ko

hamārī be-kasī ye gā rahī hai

havā-e-ranj kī tāsīr dekho

masarrat kī kalī kumhlā rahī hai

karūñ sair-e-bayābāñ ab 'vafā' maiñ

mirī vahshat mujhe le jā rahī hai

mere aage wo surat aa rahi hai

nigah-e-arzu tharra rahi hai

sada-e-zindagi ye aa rahi hai

tamanna aazmai ja rahi hai

tawajjoh se suno tum naghma-e-ishq

hamari aarzu kuchh ga rahi hai

zara sahra-nawardi kijiye phir

hamein wahshat yahi samjha rahi hai

ilahi ho dil-e-betab ki KHair

kisi ki yaad phir taDpa rahi hai

baDha jata hai darman se mera dard

sada-e-dil ye paiham aa rahi hai

ruKH-e-rangin kisi ka hai nazar mein

bahaar-e-zindagi itra rahi hai

mashiyyat nam hai taqat ka shayad

abas ghairat teri sharma rahi hai

tasawwur aur phir lutf-e-tasawwur

hamein to nind is se aa rahi hai

nigah-e-naz ko jumbish to phir do

na jaane kyon ada ye bha rahi hai

hayat-o-maut ki is kashmakash ko

ajal bhi dekh kar ghabra rahi hai

sunaun dastan-e-zindagi kya

musibat par musibat aa rahi hai

sanbhal jae tabiat ghair mumkin

tamanna kyon ise bahla rahi hai

mubarak ho nawed-e-marg tum ko

hamari be-kasi ye ga rahi hai

hawa-e-ranj ki tasir dekho

masarrat ki kali kumhla rahi hai

karun sair-e-bayaban ab 'wafa' main

meri wahshat mujhe le ja rahi hai