mere badan mein pighalta hua sa kuchh to hai

mire badan meñ pighaltā huā sā kuchh to hai

ik aur zaat meñ Dhaltā huā sā kuchh to hai

mirī sadā na sahī haañ mirā lahū na sahī

ye mauj mauj uchhaltā huā sā kuchh to hai

kahīñ na āḳhirī jhoñkā ho miTte rishtoñ kā

ye darmiyāñ se nikaltā huā sā kuchh to hai

nahīñ hai aañkh ke sahrā meñ ek buuñd sarāb

magar ye rang badaltā huā sā kuchh to hai

jo mere vāste kal zahr ban ke niklegā

tire laboñ pe sañbhaltā huā sā kuchh to hai

ye 'aks paikar-e-sad-lams hai nahīñ na sahī

kisī ḳhayāl meñ Dhaltā huā sā kuchh to hai

badan ko toḌ ke bāhar nikalnā chāhtā hai

ye kuchh to hai ye machaltā huā sā kuchh to hai

kisī ke vāste hogā payām yā koī qahr

hamāre sar se ye Taltā huā sā kuchh to hai

ye maiñ nahīñ na sahī apne sard bistar par

ye karvaTeñ sī badaltā huā sā kuchh to hai

vo kuchh to thā maiñ sahārā jise samajhtā thā

ye mere saath phisaltā huā sā kuchh to hai

bikhar rahā hai fazā meñ ye duud raushnī kā

udhar pahāḌ ke jaltā huā sā kuchh to hai

mire vujūd se jo kaT rahā hai gām-ba-gām

ye apnī raah badaltā huā sā kuchh to hai

jo chāTtā chalā jaatā hai mujh ko ai 'bānī'

ye āstīn meñ paltā huā sā kuchh to hai

mere badan mein pighalta hua sa kuchh to hai

ek aur zat mein Dhalta hua sa kuchh to hai

meri sada na sahi han mera lahu na sahi

ye mauj mauj uchhalta hua sa kuchh to hai

kahin na aaKHiri jhonka ho miTte rishton ka

ye darmiyan se nikalta hua sa kuchh to hai

nahin hai aankh ke sahra mein ek bund sarab

magar ye rang badalta hua sa kuchh to hai

jo mere waste kal zahr ban ke niklega

tere labon pe sanbhalta hua sa kuchh to hai

ye 'aks paikar-e-sad-lams hai nahin na sahi

kisi KHayal mein Dhalta hua sa kuchh to hai

badan ko toD ke bahar nikalna chahta hai

ye kuchh to hai ye machalta hua sa kuchh to hai

kisi ke waste hoga payam ya koi qahr

hamare sar se ye Talta hua sa kuchh to hai

ye main nahin na sahi apne sard bistar par

ye karwaTen si badalta hua sa kuchh to hai

wo kuchh to tha main sahaara jise samajhta tha

ye mere sath phisalta hua sa kuchh to hai

bikhar raha hai faza mein ye dud raushni ka

udhar pahaD ke jalta hua sa kuchh to hai

mere wujud se jo kaT raha hai gam-ba-gam

ye apni rah badalta hua sa kuchh to hai

jo chaTta chala jata hai mujh ko ai 'bani'

ye aastin mein palta hua sa kuchh to hai