mere badan pe saja hai barahnagi ka libas

mire badan pe sajā hai barahnagī kā libās

yahī libās huā merī zindagī kā libās

mirā ye jurm ki merī anā ke shānoñ par

paḌā huā hai ġham-e-marg-e-dostī kā libās

na mujh ko ḳhvāhish-e-hastī na aas marne kī

ki ab laboñ ne dikhāyā hai tishnagī kā libās

fasīl-e-shahr pe merī sadā bhī raushan hai

zamāna pheñkne vaalā hai tīrgī kā libās

vo jism-o-jāñ ko chhupā.e to phir bhī uryāñ hai

ki merī aañkh meñ raqsāñ hai rahbarī kā libās

lahū ke rang kī surḳhī badan kī vīrānī

kis ehtimām se laayā hai aadmī kā libās

ye garm sard havā.eñ ye āñdhiyāñ 'tāhir'

ki chāk-chāk huā ab ke āgahī kā libās

mere badan pe saja hai barahnagi ka libas

yahi libas hua meri zindagi ka libas

mera ye jurm ki meri ana ke shanon par

paDa hua hai gham-e-marg-e-dosti ka libas

na mujh ko KHwahish-e-hasti na aas marne ki

ki ab labon ne dikhaya hai tishnagi ka libas

fasil-e-shahr pe meri sada bhi raushan hai

zamana phenkne wala hai tirgi ka libas

wo jism-o-jaan ko chhupae to phir bhi uryan hai

ki meri aankh mein raqsan hai rahbari ka libas

lahu ke rang ki surKHi badan ki virani

kis ehtimam se laya hai aadmi ka libas

ye garm sard hawaen ye aandhiyan 'tahir'

ki chaak-chaak hua ab ke aagahi ka libas