mere banne se kya kya ban raha tha

mire banñe se kyā kyā ban rahā thā

maiñ banñe ko akelā ban rahā thā

aur ab jab tan chukā to sharm aa.ī

ka.ī din se ye parda ban rahā thā

ziyāda ho rahī thiiñ do sarā.eñ

maiñ phir mahfil kā hissa ban rahā thā

qayāmat aur qayāmat par qayāmat

maiñ ḳhush thā merā halqa ban rahā thā

falak miT sā gayā hadd-e-nazar tak

sitāra hī ik aisā ban rahā thā

nasheb-e-shahr thā yuuñ roz-afzūñ

miyān-e-shahr ziina ban rahā thā

ḳharābī meñ ye ḳham aayā achānak

ḳharāba achchhā-ḳhāsā ban rahā thā

maiñ aadhā jism jā baiThā vahīñ par

jahāñ baaqī kā aadhā ban rahā thā

aur ab jab kuchh na ban paayā to bole

yahī to thā jo kab kā ban rahā thā

adākārī numū-dārī thī yaksar

maiñ nā-maujūd kitnā ban rahā thā

Thahar jaanā zarūrat se thā ya.anī

guzar jaane kā lamha ban rahā thā

mujhe āsān thā honā na honā

zamāna miT rahā thā ban rahā thā

mere banne se kya kya ban raha tha

main banne ko akela ban raha tha

aur ab jab tan chuka to sharm aai

kai din se ye parda ban raha tha

ziyaada ho rahi thin do saraen

main phir mahfil ka hissa ban raha tha

qayamat aur qayamat par qayamat

main KHush tha mera halqa ban raha tha

falak miT sa gaya hadd-e-nazar tak

sitara hi ek aisa ban raha tha

nasheb-e-shahr tha yun roz-afzun

miyan-e-shahr zina ban raha tha

KHarabi mein ye KHam aaya achanak

KHaraba achchha-KHasa ban raha tha

main aadha jism ja baiTha wahin par

jahan baqi ka aadha ban raha tha

aur ab jab kuchh na ban paya to bole

yahi to tha jo kab ka ban raha tha

adakari numu-dari thi yaksar

main na-maujud kitna ban raha tha

Thahar jaana zarurat se tha yani

guzar jaane ka lamha ban raha tha

mujhe aasan tha hona na hona

zamana miT raha tha ban raha tha