mere chaara-gar tujhe kya KHabar, jo azab-e-hijr-o-visal hai

mire chāra-gar tujhe kyā ḳhabar, jo azāb-e-hijr-o-visāl hai

ye darīda tan ye darīda man tirī chāhatoñ kā kamāl hai

mujhe saañs saañs girāñ lage, ye vajūd vahm-o-gumāñ lage

maiñ talāsh ḳhud ko karūñ kahāñ mirī zaat ḳhvāb-o-ḳhayāl hai

vo jo chashm-e-tar meñ Thahar gayā vo sitāra jaane kidhar gayā

na nashāt-e-ġham kā hujūm ab na hī sabz yaad kī Daal hai

use fasl fasl bhī sīñch kar milā saaya aur na milā samar

ye ajiib ishq kā peḌ hai ye ajiib shāḳh-e-nihāl hai

mirā harf harf usī kā hai mire ḳhvāb ḳhvāb meñ vo basā

jo qarīb rah ke bhī duur hai use paanā kitnā muhāl hai

mere chaara-gar tujhe kya KHabar, jo azab-e-hijr-o-visal hai

ye darida tan ye darida man teri chahaton ka kamal hai

mujhe sans sans giran lage, ye wajud wahm-o-guman lage

main talash KHud ko karun kahan meri zat KHwab-o-KHayal hai

wo jo chashm-e-tar mein Thahar gaya wo sitara jaane kidhar gaya

na nashat-e-gham ka hujum ab na hi sabz yaad ki Dal hai

use fasl fasl bhi sinch kar mila saya aur na mila samar

ye ajib ishq ka peD hai ye ajib shaKH-e-nihaal hai

mera harf harf usi ka hai mere KHwab KHwab mein wo basa

jo qarib rah ke bhi dur hai use pana kitna muhaal hai