mere chehre se gham aankhon se hairani na jaegi

mire chehre se ġham āñkhoñ se hairānī na jā.egī

yahī sūrat rahegī aur pahchānī na jā.egī

tumhārā jhuuT mere sach kā qātil hai magar duniyā

tumhārī maan jā.egī mirī maanī na jā.egī

anā sar chaḌh ga.ī hai ik bagūle kī tarah aisī

ki sar jā.egā ik din ḳhū-e-uriyānī na jā.egī

tumhāre paas zanjīreñ hamāre dast o pā zaḳhmī

lahū zinda hai jab tak apnī man-mānī na jā.egī

mirā dukh bhī navishta hai mirī taqdīr kā shāyad

jo maiñ gul huuñ to merī chāk-dāmānī na jā.egī

sabā āvāra phirtī hai navāh-e-jāñ meñ barsoñ se

ye vo ḳhitta hai jis se us kī vīrānī na jā.egī

qalam dil meñ Dubo kar bhī 'mujībī' kuchh na haath aayā

ye vo ehsās hai jis kī pashemānī na jā.egī

mere chehre se gham aankhon se hairani na jaegi

yahi surat rahegi aur pahchani na jaegi

tumhaara jhuT mere sach ka qatil hai magar duniya

tumhaari man jaegi meri mani na jaegi

ana sar chaDh gai hai ek bagule ki tarah aisi

ki sar jaega ek din KHu-e-uriyani na jaegi

tumhaare pas zanjiren hamare dast o pa zaKHmi

lahu zinda hai jab tak apni man-mani na jaegi

mera dukh bhi nawishta hai meri taqdir ka shayad

jo main gul hun to meri chaak-damani na jaegi

saba aawara phirti hai nawah-e-jaan mein barson se

ye wo KHitta hai jis se us ki virani na jaegi

qalam dil mein Dubo kar bhi 'mujibi' kuchh na hath aaya

ye wo ehsas hai jis ki pashemani na jaegi