mere dost bhi ajab hain jo fareb kha ke roe

mire dost bhī ajab haiñ jo fareb khā ke ro.e

mujhe āzmāne nikle mujhe aazmā ke ro.e

ye to jhuuT hai sarāsar ki vo paas aa ke ro.e

ye magar ġhalat nahīñ hai ki vo duur jā ke ro.e

hameñ qatl karne vaale kā pata thā dostoñ ko

usī ḳhushnumā balā se sabhī dil lagā ke ro.e

merī qabr ke sirhāne koī kaash aa ke kah de

ki mujhe miTāne vaale bhī mujhe miTā ke ro.e

the sabhī dhueñ kī zad meñ sabhī ashk-bār nikle

mirā ghar jalāne vaale mirā ghar jalā ke ro.e

hameñ apne ġham kā 'kishvar'' koī ġham nahīñ hai itnā

magar is kā ġham bahut hai ki unheñ rulā ke ro.e

mere dost bhi ajab hain jo fareb kha ke roe

mujhe aazmane nikle mujhe aazma ke roe

ye to jhuT hai sarasar ki wo pas aa ke roe

ye magar ghalat nahin hai ki wo dur ja ke roe

hamein qatl karne wale ka pata tha doston ko

usi KHushnuma bala se sabhi dil laga ke roe

meri qabr ke sirhane koi kash aa ke kah de

ki mujhe miTane wale bhi mujhe miTa ke roe

the sabhi dhuen ki zad mein sabhi ashk-bar nikle

mera ghar jalane wale mera ghar jala ke roe

hamein apne gham ka 'kishwar koi gham nahin hai itna

magar is ka gham bahut hai ki unhen rula ke roe