mere ghayab mein jis ne hansi uDai meri

mire ġhayāb meñ jis ne hañsī uḌaa.ī mirī

kisī ne kyā use hālat nahīñ batā.ī mirī

kashish kā radd-e-kashish hai amal kā radd-e-amal

badan se lamha-ba-lamha gurez-pā.ī mirī

maiñ ek baar samundar ko jaatā dekhā gayā

phir us ke baa'd kahīñ se ḳhabar na aa.ī mirī

alag na kar sakā ab tak maiñ us ke ajzā ko

ba.iid kyā hai ki hairat ho kīmiyā.ī mirī

na kuchh ufuq kā pata hai na kuchh umuud kā hai

na jaane kaisī fazā meñ hai par-kushā.ī mirī

maiñ aap to kahīñ ab tak pahuñch nahīñ paayā

magar jagah jagah pahuñchī hai nā-rasā.ī mirī

mujhe to arsa-e-barzaḳh thā jāñ-kanī jaisā

qayāmat aa.ī to sāñsoñ meñ saañs aa.ī mirī

vazāhat is kī koī aur kar sake to kare

mirī samajh se to bāhar hai be-navā.ī mirī

havā ke safhe pe fitrat-nigārī kartā rahūñ

shajar qalam hoñ samundar hoñ raushnā.ī mirī

nikal paḌūñgā vahāñ se phir aglī duniyā ko

kabhī jo ek jahāñ tak huī rasā.ī mirī

kiran se saañs kā majmūa nazm kartā huuñ

havā ko ilm hai tālīf hai ziyā.ī mirī

zamīñ ko jaatī hai 'shāhid' na āsmānoñ ko

jis ek rāhguzar par hai naqsh-pā.ī mirī

mere ghayab mein jis ne hansi uDai meri

kisi ne kya use haalat nahin batai meri

kashish ka radd-e-kashish hai amal ka radd-e-amal

badan se lamha-ba-lamha gurez-pai meri

main ek bar samundar ko jata dekha gaya

phir us ke ba'd kahin se KHabar na aai meri

alag na kar saka ab tak main us ke ajza ko

baid kya hai ki hairat ho kimiyai meri

na kuchh ufuq ka pata hai na kuchh umud ka hai

na jaane kaisi faza mein hai par-kushai meri

main aap to kahin ab tak pahunch nahin paya

magar jagah jagah pahunchi hai na-rasai meri

mujhe to arsa-e-barzaKH tha jaan-kani jaisa

qayamat aai to sanson mein sans aai meri

wazahat is ki koi aur kar sake to kare

meri samajh se to bahar hai be-nawai meri

hawa ke safhe pe fitrat-nigari karta rahun

shajar qalam hon samundar hon raushnai meri

nikal paDunga wahan se phir agli duniya ko

kabhi jo ek jahan tak hui rasai meri

kiran se sans ka majmua nazm karta hun

hawa ko ilm hai talif hai ziyai meri

zamin ko jati hai 'shahid' na aasmanon ko

jis ek rahguzar par hai naqsh-pai meri