mere ham-nashin mere dilruba mujhe bhul ja mujhe bhul ja

mire ham-nashīñ mire dilrubā mujhe bhuul jā mujhe bhuul jā

na ḳhayāl kar mirā bā-ḳhudā mujhe bhuul jā mujhe bhuul jā

vo guzārisheñ vo navāzisheñ vo shikāyateñ vo ināyateñ

mire saath un ko bhī de bhulā mujhe bhuul jā mujhe bhuul jā

vo sahe haiñ maiñ ne tire sitam jo qalam se ho na sakeñ raqam

mirā haal jo bhī huā huā mujhe bhuul jā mujhe bhuul jā

mujhe ab kināre se kaam kyā mujhe bahr-e-ġham meñ hī chhoḌ de

ai mire safīne ke nāḳhudā mujhe bhuul jā mujhe bhuul jā

tujhe vāsta mire haal kā mire ranj-o-ġham kā malāl kā

kisī aur pe tū kar ab jafā mujhe bhuul jā mujhe bhuul jā

tirī ashk-bārī fuzūl hai tirī be-qarārī fuzūl hai

mire ġham-navā mire dil-rubā mujhe bhuul jā mujhe bhuul jā

mirī chaah kā yūñhī naam hai tujhe ab raqīboñ se kaam hai

but-e-bevafā sitam-āshnā mujhe bhuul jā mujhe bhuul jā

maiñ nahīñ huuñ qābil-e-ranj-o-ġham maiñ nahīñ huuñ lā.eq-e-ranj-o-ġham

hai shabāna roz ye iltijā mujhe bhuul jā mujhe bhuul jā

na vafā kī ab haiñ zarūrateñ na karam kī ab mujhe ḳhvāhisheñ

mirī yaad se tujhe fā.eda mujhe bhuul jā mujhe bhuul jā

kabhī dil ko tujh se piyār thā vo zamāna ab to guzar gayā

na vo dil rahā na tū dilrubā mujhe bhuul jā mujhe bhuul jā

mere ham-nashin mere dilruba mujhe bhul ja mujhe bhul ja

na KHayal kar mera ba-KHuda mujhe bhul ja mujhe bhul ja

wo guzarishen wo nawazishen wo shikayaten wo inayaten

mere sath un ko bhi de bhula mujhe bhul ja mujhe bhul ja

wo sahe hain main ne tere sitam jo qalam se ho na saken raqam

mera haal jo bhi hua hua mujhe bhul ja mujhe bhul ja

mujhe ab kinare se kaam kya mujhe bahr-e-gham mein hi chhoD de

ai mere safine ke naKHuda mujhe bhul ja mujhe bhul ja

tujhe wasta mere haal ka mere ranj-o-gham ka malal ka

kisi aur pe tu kar ab jafa mujhe bhul ja mujhe bhul ja

teri ashk-bari fuzul hai teri be-qarari fuzul hai

mere gham-nawa mere dil-ruba mujhe bhul ja mujhe bhul ja

meri chah ka yunhi nam hai tujhe ab raqibon se kaam hai

but-e-bewafa sitam-ashna mujhe bhul ja mujhe bhul ja

main nahin hun qabil-e-ranj-o-gham main nahin hun laeq-e-ranj-o-gham

hai shabana roz ye iltija mujhe bhul ja mujhe bhul ja

na wafa ki ab hain zaruraten na karam ki ab mujhe KHwahishen

meri yaad se tujhe faeda mujhe bhul ja mujhe bhul ja

kabhi dil ko tujh se piyar tha wo zamana ab to guzar gaya

na wo dil raha na tu dilruba mujhe bhul ja mujhe bhul ja