مرے ہم نوا مرے ہم سفر مرے پاس آ کوئی بات کر

مرے ہم نوا مرے ہم سفر مرے پاس آ کوئی بات کر

مرے واسطے تو ہی معتبر مرے پاس آ کوئی بات کر

مری خلوتوں کی سماعتیں تری گفتگو کو ترس گئیں

مرے رتجگے ہیں عروج پر مرے پاس آ کوئی بات کر

مرے گل ہیں مجھ سے خفا خفا مری نکہتیں ہیں نہاں نہاں

میں اداس ہوں مرے دیدہ ور مرے پاس آ کوئی بات کر

مرے جسم میں مری روح میں ہے ترے ہی دم سے یہ تازگی

مرے پاس آ مرے چارہ گر مرے پاس آ کوئی بات کر

میں نڈھال ہوں ترے ہجر میں مری چشم تر تری منتظر

ہے یہ زندگی بڑی مختصر مرے پاس آ کوئی بات کر

میں ہوں کرب میں میں ہوں جاں بہ لب مری تشنگی کو بجھا بھی دے

کہ حلق مرا ہو ذرا سا تر مرے پاس آ کوئی بات کر

مرے دل جگر ہوئے سوختہ مری روح بھی ہوئی مضطرب

مرے حال زار پہ رحم کر مرے پاس آ کوئی بات کر