mere ham-nawa mere ham-safar mere pas aa koi baat kar

mire ham-navā mire ham-safar mire paas aa koī baat kar

mire vāste tū hī mo'atabar mire paas aa koī baat kar

mirī ḳhalvatoñ kī samā.ateñ tirī guftugū ko taras ga.iiñ

mire rat-jage haiñ uruuj par mire paas aa koī baat kar

mire gul haiñ mujh se ḳhafā ḳhafā mirī nik.hateñ haiñ nihāñ nihāñ

maiñ udaas huuñ mire dīda-var mire paas aa koī baat kar

mire jism meñ mirī ruuh meñ hai tire hī dam se ye tāzgī

mire paas aa mire chārāgar mire paas aa koī baat kar

maiñ niDhāl huuñ tire hijr meñ mirī chashm-e-tar tirī muntazir

hai ye zindagī baḌī muḳhtasar mire paas aa koī baat kar

maiñ huuñ karb meñ maiñ huuñ jāñ-ba-lab mirī tishnagī ko bujhā bhī de

ki halaq mirā ho zarā sā tar mire paas aa koī baat kar

mire dil jigar hue soḳhta mirī ruuh bhī huī muztarib

mire hāl-e-zār pe rahm kar mire paas aa koī baat kar

mere ham-nawa mere ham-safar mere pas aa koi baat kar

mere waste tu hi mo'atabar mere pas aa koi baat kar

meri KHalwaton ki samaaten teri guftugu ko taras gain

mere rat-jage hain uruj par mere pas aa koi baat kar

mere gul hain mujh se KHafa KHafa meri nikhaten hain nihan nihan

main udas hun mere dida-war mere pas aa koi baat kar

mere jism mein meri ruh mein hai tere hi dam se ye tazgi

mere pas aa mere chaaragar mere pas aa koi baat kar

main niDhaal hun tere hijr mein meri chashm-e-tar teri muntazir

hai ye zindagi baDi muKHtasar mere pas aa koi baat kar

main hun karb mein main hun jaan-ba-lab meri tishnagi ko bujha bhi de

ki halaq mera ho zara sa tar mere pas aa koi baat kar

mere dil jigar hue soKHta meri ruh bhi hui muztarib

mere haal-e-zar pe rahm kar mere pas aa koi baat kar