mere ham-raqs sae ko bil-aKHir yunhi Dhalna tha

mire ham-raqs saa.e ko bil-āḳhir yūñhī Dhalnā thā

koī mausam nahīñ ruktā so mausam ko badalnā thā

taqāzā maslahat kā thā havā se dostī kar leñ

charāġhoñ ko ujāle tak yūñhī har taur jalnā thā

use to ye ijāzat thī vo jab chāhe palaT jaa.e

safar merā to baaqī thā mujhe to yūñhī chalnā thā

talātum meñ bahā kar jo mirī hastī ko le jaatī

usī mauj-e-tamannā se mujhe pahle sambhalnā thā

hameñ bhī sabz rañgat kā vo pairāhan atā hotā

hamārī āstīnoñ meñ agar sāñpoñ ko palnā thā

hamesha apne kaase meñ duāoñ kī talab rakkhī

duāoñ ke vasīle se burā har vaqt Talnā thā

batāyā thā ki ye jauhar bahut nāyāb hai jānāñ

use kho kar tumheñ yūñhī faqat hāthoñ ko malnā thā

shab-e-ġham kī tavālat se na ghabrānā 'farah' āḳhir

ye sūraj Dhal bhī jaa.e to ise phir se nikalnā thā

mere ham-raqs sae ko bil-aKHir yunhi Dhalna tha

koi mausam nahin rukta so mausam ko badalna tha

taqaza maslahat ka tha hawa se dosti kar len

charaghon ko ujale tak yunhi har taur jalna tha

use to ye ijazat thi wo jab chahe palaT jae

safar mera to baqi tha mujhe to yunhi chalna tha

talatum mein baha kar jo meri hasti ko le jati

usi mauj-e-tamanna se mujhe pahle sambhalna tha

hamein bhi sabz rangat ka wo pairahan ata hota

hamari aastinon mein agar sanpon ko palna tha

hamesha apne kase mein duaon ki talab rakkhi

duaon ke wasile se bura har waqt Talna tha

bataya tha ki ye jauhar bahut nayab hai jaanan

use kho kar tumhein yunhi faqat hathon ko malna tha

shab-e-gham ki tawalat se na ghabrana 'farah' aaKHir

ye suraj Dhal bhi jae to ise phir se nikalna tha