mere har lafz ki tauqir rahne ke liye hai

mire har lafz kī tauqīr rahne ke liye hai

maiñ vo zinda huuñ merī tahrīr rahne ke liye hai

sitam-gar ne jo pahnā.ī mire dast-e-talab meñ

ye mat samjho ki vo zanjīr rahne ke liye hai

mirā ā.īna-e-tasnīf detā hai gavāhī

mirā har nuqta-e-tafsīr rahne ke liye hai

rahegā to na terā zulm par roz-e-abad tak

hamāre dard kī jāgīr rahne ke liye hai

jise miir nigāhoñ ne kabhī dekhā nahīñ hai

mire dil meñ vahī tasvīr rahne ke liye hai

sar-e-bātil kiyā do-laḳht jis ne bhī jahāñ meñ

salāmat bas vahī shamshīr rahne ke liye hai

junūn-e-shauq taḳhrīb-e-jahāñ miT kar rahegā

magar har jazba-e-ta.amīr rahne ke liye hai

na likkhā she'r koī aur samajh baiThe haiñ nādāñ

adab meñ harba-e-tash.hīr rahne ke liye hai

guzar jā.eñge ham dār-e-fanā se 'baḳhsh' lekin

hamāre shahr kī tāsīr rahne ke liye hai

mere har lafz ki tauqir rahne ke liye hai

main wo zinda hun meri tahrir rahne ke liye hai

sitam-gar ne jo pahnai mere dast-e-talab mein

ye mat samjho ki wo zanjir rahne ke liye hai

mera aaina-e-tasnif deta hai gawahi

mera har nuqta-e-tafsir rahne ke liye hai

rahega to na tera zulm par roz-e-abad tak

hamare dard ki jagir rahne ke liye hai

jise mir nigahon ne kabhi dekha nahin hai

mere dil mein wahi taswir rahne ke liye hai

sar-e-baatil kiya do-laKHt jis ne bhi jahan mein

salamat bas wahi shamshir rahne ke liye hai

junun-e-shauq taKHrib-e-jahan miT kar rahega

magar har jazba-e-tamir rahne ke liye hai

na likkha she'r koi aur samajh baiThe hain nadan

adab mein harba-e-tashhir rahne ke liye hai

guzar jaenge hum dar-e-fana se 'baKHsh' lekin

hamare shahr ki tasir rahne ke liye hai