mere hi dil se tu puchh kitni teri adaon mein zindagi hai

mire hī dil se tū pūchh kitnī tirī adāoñ meñ zindagī hai

tirā sitam bhī karam hai mujh par tirī jafāoñ meñ zindagī hai

jo tere javoñ se hai farozāñ jo terī nik.hat se jhūmtī hai

jo tere naġhmoñ se guuñj uTThe unhīñ fazāoñ meñ zindagī hai

inhīñ se rañgīñ hai bazm-e-hastī inhīñ se nikhar hai husn-e-duniyā

jo chāheñ samjheñ jahān vaale mirī ḳhatāoñ meñ zindagī hai

ḳhushī meñ sar dhunñe vaalo sun lo ki kitnā shīrīñ hai naġhma-e-ġham

jo TuuTe dil se sadā.eñ uTThī unhīñ sadāoñ meñ zindagī hai

rachī hai sargoshiyāñ sī jin meñ hamāre rāz-o-niyāz kī hī

jo husn-o-ulfat se hī basī hai unhīñ havāoñ meñ zindagī hai

ġhurūr kitnā bhī tum ko apne ho zehn-o-bāzū kī quvvatoñ par

zarā to be-kas diloñ se pūchho ki kyā duāoñ meñ zindagī hai

tirī hasīñ kā ho saaz bajtā ki ābshāroñ kā ho tarannum

ho raqs-e-gul yā navā-e-bulbul inhīñ navāoñ meñ zindagī hai

jo be-niyāz-e-zar-e-zamīñ hai jo dil kī daulat se hī ġhanī hai

'habīb' in ko samajh na kamtar inhīñ adāoñ meñ zindagī hai

mere hi dil se tu puchh kitni teri adaon mein zindagi hai

tera sitam bhi karam hai mujh par teri jafaon mein zindagi hai

jo tere jawon se hai farozan jo teri nikhat se jhumti hai

jo tere naghmon se gunj uTThe unhin fazaon mein zindagi hai

inhin se rangin hai bazm-e-hasti inhin se nikhar hai husn-e-duniya

jo chahen samjhen jahan wale meri KHataon mein zindagi hai

KHushi mein sar dhunne walo sun lo ki kitna shirin hai naghma-e-gham

jo TuTe dil se sadaen uTThi unhin sadaon mein zindagi hai

rachi hai sargoshiyan si jin mein hamare raaz-o-niyaz ki hi

jo husn-o-ulfat se hi basi hai unhin hawaon mein zindagi hai

ghurur kitna bhi tum ko apne ho zehn-o-bazu ki quwwaton par

zara to be-kas dilon se puchho ki kya duaon mein zindagi hai

teri hasin ka ho saz bajta ki aabshaaron ka ho tarannum

ho raqs-e-gul ya nawa-e-bulbul inhin nawaon mein zindagi hai

jo be-niyaz-e-zar-e-zamin hai jo dil ki daulat se hi ghani hai

'habib' in ko samajh na kamtar inhin adaon mein zindagi hai