mere hi lafz mujhe munh chiDha gae ab ke

mire hī lafz mujhe muñh chiḌhā ga.e ab ke

kuchh aise moḌ kahānī meñ aa ga.e ab ke

vo kis kī āñkhoñ meñ Thahre the shab ke saudāgar

jo mujh ko ḳhvāboñ meñ sūraj dikhā ga.e ab ke

jinhoñ ne raah dikhā.ī thī rāhgīroñ ko

vahī charāġh salīboñ pe aa ga.e ab ke

rakhī thī ham ne jin āñkhoñ meñ ḳhvāb kī buniyād

unhīñ ko ashkoñ ke sailāb Dhā ga.e ab ke

falak kī Dor ulajhne lagī jo zulfoñ se

to kahkashāñ pe use bhī sajā ga.e ab ke

‘amāma vaale zalīloñ meñ jab nahīñ pahuñche

zalīl log imāmoñ meñ aa ga.e ab ke

khaḌe haiñ bhīge hue lā’natoñ kī bārish meñ

jo terī haañ meñ yahāñ haañ milā ga.e ab ke

mere hi lafz mujhe munh chiDha gae ab ke

kuchh aise moD kahani mein aa gae ab ke

wo kis ki aankhon mein Thahre the shab ke saudagar

jo mujh ko KHwabon mein suraj dikha gae ab ke

jinhon ne rah dikhai thi rahgiron ko

wahi charagh salibon pe aa gae ab ke

rakhi thi hum ne jin aankhon mein KHwab ki buniyaad

unhin ko ashkon ke sailab Dha gae ab ke

falak ki Dor ulajhne lagi jo zulfon se

to kahkashan pe use bhi saja gae ab ke

‘amama wale zalilon mein jab nahin pahunche

zalil log imamon mein aa gae ab ke

khaDe hain bhige hue la’naton ki barish mein

jo teri han mein yahan han mila gae ab ke