mere hisse ka har phal kyon sada kaDwa nikalta hai

mire hisse kā har phal kyoñ sadā kaḌvā nikaltā hai

bharosa jis pe kartā huuñ vahī jhūTā nikaltā hai

mirī qismat meñ likkhī hī nahīñ shāyad kabhī ḳhushiyāñ

kuaañ khodūñ jahāñ paanī vahīñ khārā nikaltā hai

yūñhī ban kar nahīñ ubhrā huuñ maiñ hiirā zamāne meñ

ki har patthar kā mere sar se ik rishta nikaltā hai

maiñ is ummīd par is baar tere paas aaya huuñ

atā hogā jo tere husn kā sadqa nikaltā hai

har ik shab chāñd to tāroñ ko le kar saath aatā hai

magar sūraj to bechāra sadā tanhā nikaltā hai

kabhī fursat mile to dekh lo tanhā.ī meñ aa kar

tumhārī yaad meñ āñkhoñ se jo dariyā nikaltā hai

koī muflis kare bachche kī ḳhvāhish kis tarah puurī

khilaunā jo pasand aatā hai vo mahñgā nikaltā hai

sabhī taare falak par itne ḳhush-qismat nahīñ hote

sivā ik chāñd ke nazdīk jo taarā nikaltā hai

nahīñ bujhtī hai shāyad pyaas ab logoñ kī paanī se

jise dekho hamāre ḳhuun kā pyāsā nikaltā hai

yaqīñ kis par kareñ apnā kaheñ kis ko yahāñ 'tāriq'

ki ab har shaḳhs ke chehre pe ik chehra nikaltā hai

mere hisse ka har phal kyon sada kaDwa nikalta hai

bharosa jis pe karta hun wahi jhuTa nikalta hai

meri qismat mein likkhi hi nahin shayad kabhi KHushiyan

kuan khodun jahan pani wahin khaara nikalta hai

yunhi ban kar nahin ubhra hun main hira zamane mein

ki har patthar ka mere sar se ek rishta nikalta hai

main is ummid par is bar tere pas aaya hun

ata hoga jo tere husn ka sadqa nikalta hai

har ek shab chand to taron ko le kar sath aata hai

magar suraj to bechaara sada tanha nikalta hai

kabhi fursat mile to dekh lo tanhai mein aa kar

tumhaari yaad mein aankhon se jo dariya nikalta hai

koi muflis kare bachche ki KHwahish kis tarah puri

khilauna jo pasand aata hai wo mahnga nikalta hai

sabhi tare falak par itne KHush-qismat nahin hote

siwa ek chand ke nazdik jo tara nikalta hai

nahin bujhti hai shayad pyas ab logon ki pani se

jise dekho hamare KHun ka pyasa nikalta hai

yaqin kis par karen apna kahen kis ko yahan 'tariq'

ki ab har shaKHs ke chehre pe ek chehra nikalta hai