mere izhaar ne ghaibi suKHan ko oDh rakha hai

mire iz.hār ne ġhaibī suḳhan ko oḌh rakhā hai

yaqīñ ne bhī gumāñ kī ik kiran ko oḌh rakhā hai

koī samjhauta bhī mumkin hai kyā tark-e-mohabbat meñ

isī ik soch ne jaise ghuTan ko oḌh rakhā hai

palaT aa.e to haiñ ham sulh kī shartoñ ko Thukrā kar

magar pairoñ ne sadiyoñ kī thakan ko oḌh rakhā hai

jabīnoñ par nishāñ sajdoñ ke haiñ hāthoñ meñ shamshīreñ

aqīde ne tashaddud ke badan ko oḌh rakhā hai

ragoñ meñ dauḌtī phirtīñ haiñ sūiyāñ zahr meñ Duubī

ki dil ne ḳhuun meñ bahtī chubhan ko oḌh rakhā hai

chhupā letā hai saare zaḳhm dīda-zeb-o-dil-kash hai

'sadaf' kī ruuh ne aise badan ko oḌh rakhā hai

mere izhaar ne ghaibi suKHan ko oDh rakha hai

yaqin ne bhi guman ki ek kiran ko oDh rakha hai

koi samjhauta bhi mumkin hai kya tark-e-mohabbat mein

isi ek soch ne jaise ghuTan ko oDh rakha hai

palaT aae to hain hum sulh ki sharton ko Thukra kar

magar pairon ne sadiyon ki thakan ko oDh rakha hai

jabinon par nishan sajdon ke hain hathon mein shamshiren

aqide ne tashaddud ke badan ko oDh rakha hai

ragon mein dauDti phirtin hain suiyan zahr mein Dubi

ki dil ne KHun mein bahti chubhan ko oDh rakha hai

chhupa leta hai sare zaKHm dida-zeb-o-dil-kash hai

'sadaf' ki ruh ne aise badan ko oDh rakha hai