mere KHayal ka saya jahan paDa hoga

mire ḳhayāl kā saaya jahāñ paḌā hogā

ba-rañg-e-rañg-e-tilism-e-ravāñ paḌā hogā

vafūr-e-yās meñ ummīd jab jalī hogī

samay kī aañkh meñ kuchh to dhuāñ paḌā hogā

utar ga.ī jo añdheroñ meñ hañs ke us pahlī

kiran kā paañv na jaane kahāñ paḌā hogā

shu.ūr-e-nau ke jab ā.īne uḌ rahe hoñge

ajiib aks-e-mah-o-kahkashāñ paḌā hogā

har āh-e-sard laboñ tak pahuñch ga.ī hogī

har āh-e-sard kā dil par nishāñ paḌā hogā

kise ḳhabar thī ki gulchīñ kī qaid meñ ik din

guloñ ke sāmne ḳhud bāġhbāñ paḌā hogā

qasam tirī mire maulā vo din qarīb hai jab

zamīñ ke paañv tirā āsmāñ paḌā hogā

mere KHayal ka saya jahan paDa hoga

ba-rang-e-rang-e-tilism-e-rawan paDa hoga

wafur-e-yas mein ummid jab jali hogi

samay ki aankh mein kuchh to dhuan paDa hoga

utar gai jo andheron mein hans ke us pahli

kiran ka panw na jaane kahan paDa hoga

shuur-e-nau ke jab aaine uD rahe honge

ajib aks-e-mah-o-kahkashan paDa hoga

har aah-e-sard labon tak pahunch gai hogi

har aah-e-sard ka dil par nishan paDa hoga

kise KHabar thi ki gulchin ki qaid mein ek din

gulon ke samne KHud baghban paDa hoga

qasam teri mere maula wo din qarib hai jab

zamin ke panw tera aasman paDa hoga