mere liye to ye saneha bhi naya nahin tha

mire liye to ye sāneha bhī nayā nahīñ thā

masāfat-e-jāñ kā ham-safar bhī mirā nahīñ thā

laboñ pe pahuñche to nīm-jāñ the hurūf saare

samā.atoñ kā koī darīcha khulā nahīñ thā

na mil sakī us ko raushnī kī koī bashārat

ki tīrgī kā azaab us ne sahā nahīñ thā

nigāh-e-gulshan meñ jo khaTaktā thā ḳhaar ban ke

gale lagā kar use jo dekhā burā nahīñ thā

vo sāhab-e-iḳhtiyār-o-masnad vo merā munsif

vo hākim-e-mutlaq-ul-anān thā ḳhudā nahīñ thā

harīm-e-jāñ meñ mahak rahā hai vo harf-e-ḳhushbū

ki jo abhī shāḳhsār-e-lab par khilā nahīñ thā

mere liye to ye saneha bhi naya nahin tha

masafat-e-jaan ka ham-safar bhi mera nahin tha

labon pe pahunche to nim-jaan the huruf sare

samaaton ka koi daricha khula nahin tha

na mil saki us ko raushni ki koi bashaarat

ki tirgi ka azab us ne saha nahin tha

nigah-e-gulshan mein jo khaTakta tha KHar ban ke

gale laga kar use jo dekha bura nahin tha

wo sahab-e-iKHtiyar-o-masnad wo mera munsif

wo hakim-e-mutlaq-ul-anan tha KHuda nahin tha

harim-e-jaan mein mahak raha hai wo harf-e-KHushbu

ki jo abhi shaKHsar-e-lab par khila nahin tha