mere nasib mein likkhe hue ko Talta hai

mire nasīb meñ likkhe hue ko Tāltā hai

koī to hai jo mujhe is tarah sañbhāltā hai

bayān hāl-e-dil-e-zār kis tarah kartā

vo merī baat ko suntā nahīñ uchhāltā hai

ḳharāj ham pe lagā kar baḌī suhūlat se

hamāre khāte meñ apnā ḳhasāra Dāltā hai

agarche ham to milāte haiñ zahr miTTī meñ

magar jo zā.iqe mīThe shajar nikāltā hai

uḌā ke dhuul guzartā hai mere raste meñ

safar ko jab vo kisī sānahe meñ Dhāltā hai

phir ek vaqt kisī kaam kā nahīñ rahtā

jo baap ḳhuun pasīne se tum ko pāltā hai

mere nasib mein likkhe hue ko Talta hai

koi to hai jo mujhe is tarah sanbhaalta hai

bayan haal-e-dil-e-zar kis tarah karta

wo meri baat ko sunta nahin uchhaalta hai

KHaraj hum pe laga kar baDi suhulat se

hamare khate mein apna KHasara Dalta hai

agarche hum to milate hain zahr miTTi mein

magar jo zaiqe miThe shajar nikalta hai

uDa ke dhul guzarta hai mere raste mein

safar ko jab wo kisi sanahe mein Dhaalta hai

phir ek waqt kisi kaam ka nahin rahta

jo bap KHun pasine se tum ko palta hai