mere nishan bahut hain jahan bhi hota hun

mire nishān bahut haiñ jahāñ bhī hotā huuñ

magar dar-asl vahīñ be-nishāñ bhī hotā huuñ

usī ke rahtā huuñ ḳhvāb-o-ḳhayāl meñ aksar

magar kabhī kabhī apne yahāñ bhī hotā huuñ

idhar udhar mujhe rakhtā hai vo bahut lekin

kabhī-kabhār magar darmiyāñ bhī hotā huuñ

lagā bhī kartī hai bāzār meñ mirī qīmat

kisī kisī ke liye rā.egāñ bhī hotā huuñ

banā.e rakhte haiñ sab mīr-e-kārvāñ bhī mujhe

kabhī maiñ gard-e-rah-e-kārvāñ bhī hotā huuñ

bashar huuñ maiñ ka.ī majbūriyāñ bhī haiñ merī

udaas rahte hue shādmāñ bhī hotā huuñ

paḌā TheThurtā bhī huuñ barf barf mausam meñ

usī zamāne meñ ātish-fishāñ bhī hotā huuñ

badaltī rahtī hai merī bhī kaifiyat kyā kuchh

ki aag hī nahīñ rahtā dhuāñ bhī hotā huuñ

maiñ jān-o-jism huuñ ghar ho ki vo galī ho 'zafar'

yahāñ bhī hotā huuñ maiñ aur vahāñ bhī hotā huuñ

mere nishan bahut hain jahan bhi hota hun

magar dar-asl wahin be-nishan bhi hota hun

usi ke rahta hun KHwab-o-KHayal mein aksar

magar kabhi kabhi apne yahan bhi hota hun

idhar udhar mujhe rakhta hai wo bahut lekin

kabhi-kabhaar magar darmiyan bhi hota hun

laga bhi karti hai bazar mein meri qimat

kisi kisi ke liye raegan bhi hota hun

banae rakhte hain sab mir-e-karwan bhi mujhe

kabhi main gard-e-rah-e-karwan bhi hota hun

bashar hun main kai majburiyan bhi hain meri

udas rahte hue shadman bhi hota hun

paDa TheThurta bhi hun barf barf mausam mein

usi zamane mein aatish-fishan bhi hota hun

badalti rahti hai meri bhi kaifiyat kya kuchh

ki aag hi nahin rahta dhuan bhi hota hun

main jaan-o-jism hun ghar ho ki wo gali ho 'zafar'

yahan bhi hota hun main aur wahan bhi hota hun