mere pahlu se jo nikle wo meri jaan ho kar

mire pahlū se jo nikle vo mirī jaañ ho kar

rah gayā shauq dil-e-zār meñ armāñ ho kar

ziist do roza hai hañs-khel ke kaaTo is ko

gul ne ye raaz batāyā mujhe ḳhandāñ ho kar

ashk-e-shādī hai ye kuchh muzhda sabā laa.ī hai

shabnam-ālūda huā phuul jo ḳhandāñ ho kar

zarra-e-vādi-e-ulfat pe munāsib hai nigāh

falak-e-husn pe ḳhurshīd-e-daraḳhshāñ ho kar

shoḳhiyāñ us nigah-e-zer-e-mizha kī mat pūchh

dil-e-āshiq meñ khubī jaatī hai paikāñ ho kar

shiddat-e-shauq-e-shahādat kā kahūñ kyā aalam

teġh-e-qātil paḌī sar pe mire ehsāñ ho kar

ab to vo ḳhabt mire ishq ko kah kar dekheñ

ḳhud hī ā.īne ko takne lage hairāñ ho kar

mere pahlu se jo nikle wo meri jaan ho kar

rah gaya shauq dil-e-zar mein arman ho kar

zist do roza hai hans-khel ke kaTo is ko

gul ne ye raaz bataya mujhe KHandan ho kar

ashk-e-shadi hai ye kuchh muzhda saba lai hai

shabnam-aluda hua phul jo KHandan ho kar

zarra-e-wadi-e-ulfat pe munasib hai nigah

falak-e-husn pe KHurshid-e-daraKHshan ho kar

shoKHiyan us nigah-e-zer-e-mizha ki mat puchh

dil-e-ashiq mein khubi jati hai paikan ho kar

shiddat-e-shauq-e-shahadat ka kahun kya aalam

tegh-e-qatil paDi sar pe mere ehsan ho kar

ab to wo KHabt mere ishq ko kah kar dekhen

KHud hi aaine ko takne lage hairan ho kar