mere qalam mein the zinda mere bayan mein the

mire qalam meñ the zinda mire bayān meñ the

vo harf harf mire dil kī dāstān meñ the

unheñ nigal ga.ī gumnāmiyoñ kī tārīkī

zamīñ ke log jo shohrat ke āsmān meñ the

hamārī naav ko tūfān se bachā laa.e

tumhārī yaad ke jhoñke jo bādbān meñ the

unheñ bhī dard kī fōtpath par paḌe paayā

jo ranj-o-ġham se pare pur-sukūñ makān meñ the

kabhī na shikva kiyā ham ne kam-nasībī kā

sitāre apne muqaddar ke āsmān meñ the

koī javāb nahīñ jin kā is samāj ke paas

savāl aise bhī bachchoñ ke imtihān meñ the

rakhe the mere liye vaqt ne jo tarkash meñ

vo saare tiir sitamgar tirī kamān meñ the

jahāñ pe rūh-e-muqaddas kī jalva-gāheñ haiñ

hamārī fikr ke panchhī vahāñ uḌaan meñ the

tamām umr kaḌī dhuup chhū nahīñ paa.ī

ki ham kisī kī mohabbat ke sā.ebān meñ the

kabhī na shauq-e-safar kam huā mirā ai 'shauq'

na.e safar ke irāde mirī thakān meñ the

mere qalam mein the zinda mere bayan mein the

wo harf harf mere dil ki dastan mein the

unhen nigal gai gumnamiyon ki tariki

zamin ke log jo shohrat ke aasman mein the

hamari naw ko tufan se bacha lae

tumhaari yaad ke jhonke jo baadban mein the

unhen bhi dard ki footpath par paDe paya

jo ranj-o-gham se pare pur-sukun makan mein the

kabhi na shikwa kiya hum ne kam-nasibi ka

sitare apne muqaddar ke aasman mein the

koi jawab nahin jin ka is samaj ke pas

sawal aise bhi bachchon ke imtihan mein the

rakhe the mere liye waqt ne jo tarkash mein

wo sare tir sitamgar teri kaman mein the

jahan pe ruh-e-muqaddas ki jalwa-gahen hain

hamari fikr ke panchhi wahan uDan mein the

tamam umr kaDi dhup chhu nahin pai

ki hum kisi ki mohabbat ke saeban mein the

kabhi na shauq-e-safar kam hua mera ai 'shauq'

nae safar ke irade meri thakan mein the