mere sawal ka yaron se kya jawab mile

mire savāl kā yāroñ se kyā javāb mile

mile jo ahl-e-ḳhirad bhī to mahv-e-ḳhvāb mile

ye rang-o-bū to fareb-e-nazar ke jalve haiñ

mirī nigāh kā dhokā thā jo sarāb mile

talāsh-e-haq meñ kabhī us maqām tak pahuñchā

ki gard-e-rāh meñ dekhā to āftāb mile

mire ta.iiñ ye saḳhāvat are ma.āz-allāh

samundaroñ kī zarūrat ho aur janāb mile

qasam ḳhudā kī na jā.ūñgā sū-e-mai-ḳhāna

tirī nigāh se mujh ko agar sharāb mile

na jaane karne lage mujh se ab vo kyoñ parda

mile haiñ pahle vo jab bhī to be-hijāb mile

agar hai faḳhr to hai apnī bad-nasībī par

talāsh ḳhuub kī thī aur mujhe ḳharāb mile

tumhāre shahr meñ aa.e the sair karne ko

tumhāre shahr meñ mujh ko bahut azaab mile

sunā thā maiñ ne ki bāġh-o-bahār haiñ 'tishna'

hujūm-e-yās kā ik but bane janāb mile

mere sawal ka yaron se kya jawab mile

mile jo ahl-e-KHirad bhi to mahw-e-KHwab mile

ye rang-o-bu to fareb-e-nazar ke jalwe hain

meri nigah ka dhoka tha jo sarab mile

talash-e-haq mein kabhi us maqam tak pahuncha

ki gard-e-rah mein dekha to aaftab mile

mere tain ye saKHawat are maaz-allah

samundaron ki zarurat ho aur janab mile

qasam KHuda ki na jaunga su-e-mai-KHana

teri nigah se mujh ko agar sharab mile

na jaane karne lage mujh se ab wo kyon parda

mile hain pahle wo jab bhi to be-hijab mile

agar hai faKHr to hai apni bad-nasibi par

talash KHub ki thi aur mujhe KHarab mile

tumhaare shahr mein aae the sair karne ko

tumhaare shahr mein mujh ko bahut azab mile

suna tha main ne ki bagh-o-bahaar hain 'tishna'

hujum-e-yas ka ek but bane janab mile