mere shane pe rahne do abhi gesu zara Thahro

mire shāne pe rahne do abhī gesū zarā Thahro

bikhar jaane do apne jism kī ḳhushbū zarā Thahro

adhūrā chhoḌ kar jaao na ye qissa mohabbat kā

chhanakte haiñ abhī armān ke ghuñghrū zarā Thahro

sukūn-e-qalb kī ḳhātir shab-e-furqat maiñ chūmūñgā

banā lene do tasvīr-e-lab-o-abrū zarā Thahro

mirī rag rag meñ jānāñ bhar gayā hai nasha-e-qurbat

utar jaa.e tumhāre lams kā jaadū zarā Thahro

ye mausam kā taqāza aur bhīgī shab kī hasrat hai

badalnā ishq meñ hai āḳhirī pahlū zarā Thahro

kaleja shaq huā jaa.e bichhaḌne ke tasavvur se

mohabbat dil meñ kartī hai ab hā-o-hū zarā Thahro

ravāñ hai ḳhuun kā dariyā mirī āñkhoñ se ai 'shamsī'

abhī raqsāñ hai dil meñ dard kā jugnū zarā Thahro

mere shane pe rahne do abhi gesu zara Thahro

bikhar jaane do apne jism ki KHushbu zara Thahro

adhura chhoD kar jao na ye qissa mohabbat ka

chhanakte hain abhi arman ke ghunghru zara Thahro

sukun-e-qalb ki KHatir shab-e-furqat main chumunga

bana lene do taswir-e-lab-o-abru zara Thahro

meri rag rag mein jaanan bhar gaya hai nasha-e-qurbat

utar jae tumhaare lams ka jadu zara Thahro

ye mausam ka taqaza aur bhigi shab ki hasrat hai

badalna ishq mein hai aaKHiri pahlu zara Thahro

kaleja shaq hua jae bichhaDne ke tasawwur se

mohabbat dil mein karti hai ab ha-o-hu zara Thahro

rawan hai KHun ka dariya meri aankhon se ai 'shamsi'

abhi raqsan hai dil mein dard ka jugnu zara Thahro