mere waste jahan mein koi dilkashi nahin hai

mire vāste jahāñ meñ koī dilkashī nahīñ hai

ki tire baġhair jiinā koī zindagī nahīñ hai

tirī zaat ke alāva mujhe aur chahiye kyā

tū agar hai saath mere mujhe kuchh kamī nahīñ hai

vo nazar nazar nahīñ hai na ho jis meñ aks terā

koī dil hai vo bhī jis meñ ġham-e-āshiqī nahīñ hai

koī vāsta nahīñ hai jise dard-e-dīgarāñ se

vo hai aadmī kā paikar magar aadmī nahīñ hai

mire dosto na dekho mujhe chashm-e-ḳhashmagīñ se

ki rahīn-e-bāda-noshī mirī be-ḳhudī nahīñ hai

mire dil ke daaġh tū hī zarā aur lau baḌhā de

shab-e-ġham hai tiira tiira kahīñ raushnī nahīñ hai

mirī baat sun ke 'aḳhtar' sunī an-sunī na kar do

ye hadīs-e-jān-o-dil he nirī shā.irī nahīñ hai

mere waste jahan mein koi dilkashi nahin hai

ki tere baghair jina koi zindagi nahin hai

teri zat ke alawa mujhe aur chahiye kya

tu agar hai sath mere mujhe kuchh kami nahin hai

wo nazar nazar nahin hai na ho jis mein aks tera

koi dil hai wo bhi jis mein gham-e-ashiqi nahin hai

koi wasta nahin hai jise dard-e-digaran se

wo hai aadmi ka paikar magar aadmi nahin hai

mere dosto na dekho mujhe chashm-e-KHashmagin se

ki rahin-e-baada-noshi meri be-KHudi nahin hai

mere dil ke dagh tu hi zara aur lau baDha de

shab-e-gham hai tera tera kahin raushni nahin hai

meri baat sun ke 'aKHtar' suni an-suni na kar do

ye hadis-e-jaan-o-dil he niri shairi nahin hai