mere wajud ko usne ajab kamal diya

mire vajūd ko us ne ajab kamāl diyā

ki musht-e-ḳhāk thā aflāk par uchhāl diyā

makāñ ko jhūTe makīnoñ se paak karnā thā

so maiñ ne is se har ummīd ko nikāl diyā

mirī talab meñ takalluf bhī inkisār bhī thā

vo nukta-sanj thā sab mere hasb-e-hāl diyā

badal ke rakh diye hijr o visāl ke mafhūm

mujhe to us ne baḌī kashmakash meñ Daal diyā

maiñ us kī banda-navāzī ke ramz jāntā huuñ

ki rizq-e-shauq diyā luqma-e-halāl diyā

mire ḳhudā ne atā kī mujhe zabāñ aur phir

zabāñ ko martaba-e-jur.at-e-savāl diyā

mere wajud ko us ne ajab kamal diya

ki musht-e-KHak tha aflak par uchhaal diya

makan ko jhuTe makinon se pak karna tha

so main ne is se har ummid ko nikal diya

meri talab mein takalluf bhi inkisar bhi tha

wo nukta-sanj tha sab mere hasb-e-haal diya

badal ke rakh diye hijr o visal ke mafhum

mujhe to us ne baDi kashmakash mein Dal diya

main us ki banda-nawazi ke ramz jaanta hun

ki rizq-e-shauq diya luqma-e-halal diya

mere KHuda ne ata ki mujhe zaban aur phir

zaban ko martaba-e-jurat-e-sawal diya