mere wajud mein ab aashiqi ki chah kahan

mire vajūd meñ ab āshiqī kī chaah kahāñ

ki mujh sā shaḳhs kahāñ aur ye gunāh kahāñ

abhī mile haiñ mohabbat meñ chand hī aañsū

abhī hue ho mire yaar tum tabāh kahāñ

kisī ko chhoḌ ke vo aur kisī ke paas gayā

ki mushrikoñ se huā hai kabhī nibāh kahāñ

gunāhgāroñ kī izzat agar yuuñ hotī rahī

to aise haal meñ jā.eñge be-gunāh kahāñ

ai rāhgīr rah-e-ishq kyā ye jānte ho

ki le ke jā.egī tum ko tumhārī raah kahāñ

mujhe yaqīñ haiñ ye rab kā to intiḳhāb na thā

ruḳh-e-hasīn kahāñ chehra-e-siyāh kahāñ

sunā.eñ kyoñ na raqīboñ ko hāl-e-dil apnā

ki mere dost rahe mere ḳhair-ḳhvāh kahāñ

mere wajud mein ab aashiqi ki chah kahan

ki mujh sa shaKHs kahan aur ye gunah kahan

abhi mile hain mohabbat mein chand hi aansu

abhi hue ho mere yar tum tabah kahan

kisi ko chhoD ke wo aur kisi ke pas gaya

ki mushrikon se hua hai kabhi nibah kahan

gunahgaron ki izzat agar yun hoti rahi

to aise haal mein jaenge be-gunah kahan

ai rahgir rah-e-ishq kya ye jaante ho

ki le ke jaegi tum ko tumhaari rah kahan

mujhe yaqin hain ye rab ka to intiKHab na tha

ruKH-e-hasin kahan chehra-e-siyah kahan

sunaen kyon na raqibon ko haal-e-dil apna

ki mere dost rahe mere KHair-KHwah kahan