mere wajud se farigh kiya gaya mujhko

mire vajūd se fāriġh kiyā gayā mujh ko

phir e'timād meñ kaise liyā gayā mujh ko

maiñ us fasīl se bāhar nikal to aatā magar

mirī zabān ke andar siyā gayā mujh ko

phir us se kaise jalātā maiñ koī aur charāġh

diyā jalā ke havā meñ diyā gayā mujh ko

tabhī to us ne mujhe mārne kī koshish kī

maiñ mar gayā to maze se jiyā gayā mujh ko

phir ek dasht numūdār ho gayā mujh meñ

maiñ ek dariyā thā kaise piyā gayā mujh ko

maiñ apne qad se baḌā honā chāhtā thā magar

mire vajūd se chhoTā kiyā gayā mujh ko

koī bhī chāñd chiḌhāyā nahīñ gayā mujh se

agarche haath meñ sūraj diyā gayā mujh ko

mere wajud se farigh kiya gaya mujh ko

phir e'timad mein kaise liya gaya mujh ko

main us fasil se bahar nikal to aata magar

meri zaban ke andar siya gaya mujh ko

phir us se kaise jalata main koi aur charagh

diya jala ke hawa mein diya gaya mujh ko

tabhi to us ne mujhe marne ki koshish ki

main mar gaya to maze se jiya gaya mujh ko

phir ek dasht numudar ho gaya mujh mein

main ek dariya tha kaise piya gaya mujh ko

main apne qad se baDa hona chahta tha magar

mere wajud se chhoTa kiya gaya mujh ko

koi bhi chand chiDhaya nahin gaya mujh se

agarche hath mein suraj diya gaya mujh ko