mere zaKHm-e-jigar ko zaKHm-e-daman-dar hona tha

mire zaḳhm-e-jigar ko zaḳhm-e-dāman-dār honā thā

zarā vāzeh tumhāre lutf kā iz.hār honā thā

dil-e-pur-dāġh kī tārīkiyoñ par saḳht hairat hai

ye vo matl.a hai jis ko matla-e-anvār honā thā

tumheñ lenā thā pahle jā.eza apnī nigāhoñ kā

phir us ke ba.ad muusā tālib-e-dīdār honā thā

pareshāñ haiñ misāl-e-gard-gumnāmī ke sahrā meñ

bahut aise ki jin ko qāfila-sālār honā thā

udhar vo aa.e āñkhoñ meñ idhar ḳhvāb-e-ajal aayā

kahāñ soī huī taqdīr ko bedār honā thā

koī dekhe to 'fāzil' qābiliyyat bāġhbānoñ kī

vahāñ kāñTe hī kāñTe haiñ jahāñ gulzār honā thā

mere zaKHm-e-jigar ko zaKHm-e-daman-dar hona tha

zara wazeh tumhaare lutf ka izhaar hona tha

dil-e-pur-dagh ki tarikiyon par saKHt hairat hai

ye wo matla hai jis ko matla-e-anwar hona tha

tumhein lena tha pahle jaeza apni nigahon ka

phir us ke baad musa talib-e-didar hona tha

pareshan hain misal-e-gard-gumnami ke sahra mein

bahut aise ki jin ko qafila-salar hona tha

udhar wo aae aankhon mein idhar KHwab-e-ajal aaya

kahan soi hui taqdir ko bedar hona tha

koi dekhe to 'fazil' qabiliyyat baghbanon ki

wahan kanTe hi kanTe hain jahan gulzar hona tha