meri aah be-asar hai main asar kahan se laun

mirī aah be-asar hai maiñ asar kahāñ se lā.ūñ

tire paas tak jo pahuñche vo nazar kahāñ se lā.ūñ

mujhe bhuul jaane vaale tujhe kis tarah bhulā.ūñ

jise dard raas aa.e vo jigar kahāñ se lā.ūñ

mire rizq-e-bandagī ko tire dar se vāsta hai

jo jhuke barū-e-kāba maiñ vo sar kahāñ se lā.ūñ

mire paas dil ke TukḌe mire paas ḳhuuñ ke aañsū

tū hai sīm-o-zar kī devī to maiñ zar kahāñ se lā.ūñ

shab-e-ġham ke ye añdhere mirā saath de rahe haiñ

jo miTā.e zulmatoñ ko vo sahar kahāñ se lā.ūñ

vahī barq jis ne gir kar mirī zindagī jalā dī

maiñ usī ko DhūñDtā huuñ vo sharar kahāñ se lā.ūñ

mirī zindagī hai 'shevan' kuchh 'ajīb kashmakash meñ

vo asar ko chāhte haiñ maiñ asar kahāñ se lā.ūñ

meri aah be-asar hai main asar kahan se laun

tere pas tak jo pahunche wo nazar kahan se laun

mujhe bhul jaane wale tujhe kis tarah bhulaun

jise dard ras aae wo jigar kahan se laun

mere rizq-e-bandagi ko tere dar se wasta hai

jo jhuke baru-e-kaba main wo sar kahan se laun

mere pas dil ke TukDe mere pas KHun ke aansu

tu hai sim-o-zar ki dewi to main zar kahan se laun

shab-e-gham ke ye andhere mera sath de rahe hain

jo miTae zulmaton ko wo sahar kahan se laun

wahi barq jis ne gir kar meri zindagi jala di

main usi ko DhunDta hun wo sharar kahan se laun

meri zindagi hai 'shewan' kuchh 'ajib kashmakash mein

wo asar ko chahte hain main asar kahan se laun