meri aankhon mein jo thoDi si nami rah gai hai

mirī āñkhoñ meñ jo thoḌī sī namī rah ga.ī hai

bas yahī ishq kī sauġhāt bachī rah ga.ī hai

vaqt ke saath hī gul ho ga.e vahshat ke charāg

ik siyāhī hai jo tāqoñ pe abhī rah ga.ī hai

aur kuchh der Thahar ai mirī bīnā.ī ki maiñ

dekh luuñ ruuh meñ jo baḳhiya-garī rah ga.ī hai

ā.īno tum hī kaho kyā hai mire hoñToñ par

log kahte haiñ ki phīkī sī hañsī rah ga.ī hai

bojh sūraj kā to maiñ kab kā utaar aayā magar

dhuup jo sar pe dharī thī so dharī rah ga.ī hai

kuchh batā ai mare nisyān ye kyā mājrā hai

baat jo bhūlne vaalī thī vahī rah ga.ī hai

yuuñ to is ghar ke dar-o-bām sabhī TuuT ga.e

haañ magar biich kī dīvār abhī rah ga.ī hai

sochtā huuñ ki tasavvur ko sameTūñ kaise

bistar-e-ḳhvāb pe bhī aañkh khulī rah ga.ī hai

jaane kyā baat hai mausam meñ 'ziyā' ab ke baras

dhuup ke hote hue barf jamī rah ga.ī hai

meri aankhon mein jo thoDi si nami rah gai hai

bas yahi ishq ki saughat bachi rah gai hai

waqt ke sath hi gul ho gae wahshat ke charag

ek siyahi hai jo taqon pe abhi rah gai hai

aur kuchh der Thahar ai meri binai ki main

dekh lun ruh mein jo baKHiya-gari rah gai hai

aaino tum hi kaho kya hai mere honTon par

log kahte hain ki phiki si hansi rah gai hai

bojh suraj ka to main kab ka utar aaya magar

dhup jo sar pe dhari thi so dhari rah gai hai

kuchh bata ai mare nisyan ye kya majra hai

baat jo bhulne wali thi wahi rah gai hai

yun to is ghar ke dar-o-baam sabhi TuT gae

han magar bich ki diwar abhi rah gai hai

sochta hun ki tasawwur ko sameTun kaise

bistar-e-KHwab pe bhi aankh khuli rah gai hai

jaane kya baat hai mausam mein 'ziya' ab ke baras

dhup ke hote hue barf jami rah gai hai