meri aawaz mujhko de de pyare

mirī āvāz mujh ko de de pyāre

suḳhan ke raaz mujh ko de de pyāre

maiñ terā āsmāñ jī bhar ke dekhūñ

par-e-parvāz mujh ko de de pyāre

na.ī taḳhlīq kar kaun-o-makāñ kī

ye TuuTe saaz mujh ko de de pyāre

batā mujh meñ tirā kyā kuchh nahīñ hai

mire kuchh raaz mujh ko de de pyāre

tujhe chāhūñ tirā hī naam luuñ maiñ

mirā āġhāz mujh ko de de pyāre

pukārūñgā tujhe kis kis jagah maiñ

kabhī āvāz mujh ko de de pyāre

batā kab tak rahūñ maiñ duur tujh se

mirā andāz mujh ko de de pyāre

maiñ adnā harf terī dāstāñ kā

koī hamrāz mujh ko de de pyāre

mujhe mahdūd rakh apnī anā meñ

zamīñ ke raaz mujh ko de de pyāre

meri aawaz mujh ko de de pyare

suKHan ke raaz mujh ko de de pyare

main tera aasman ji bhar ke dekhun

par-e-parwaz mujh ko de de pyare

nai taKHliq kar kaun-o-makan ki

ye TuTe saz mujh ko de de pyare

bata mujh mein tera kya kuchh nahin hai

mere kuchh raaz mujh ko de de pyare

tujhe chahun tera hi nam lun main

mera aaghaz mujh ko de de pyare

pukarunga tujhe kis kis jagah main

kabhi aawaz mujh ko de de pyare

bata kab tak rahun main dur tujh se

mera andaz mujh ko de de pyare

main adna harf teri dastan ka

koi hamraaz mujh ko de de pyare

mujhe mahdud rakh apni ana mein

zamin ke raaz mujh ko de de pyare