meri ana ka taqaza hai kya na jaane kya

mirī anā kā taqāzā hai kyā na jaane kyā

mire vujūd se le jā.egā na jaane kyā

hai tere shahr kī āb-o-havā na jaane kyā

koī to baat hai is meñ judā na jaane kyā

añdhere raat ke kuchh aur ho ga.e gahre

lapak uThā thā kahīñ nuur sā na jaane kyā

mirā hī chehra dikhāne ke vāste mujh ko

karegā mujh se talab aa.ina na jaane kyā

muhīb ḳhāmushī chhā.ī hai shahr-andar-shahr

uḌā ke le ga.ī pāgal havā na jaane kyā

azal hī se maiñ sanā-ḳhvān-e-nik.hat-o-gul huuñ

hai mere vāste bād-e-sabā na jaane kyā

bhare zamāne ko dushman banā liyā us ne

tamām 'umr vo kartā rahā na jaane kyā

kabhī kabhī to vo ḳhud se bhī ho gayā munkir

kabhī kabhī to use ho gayā na jaane kyā

ḳhud apne ḳhuun meñ ḳhanjar Dubo liyā us ne

ḳhushī kā lamha use kar gayā na jaane kyā

huī jo us se mulāqāt aaj barsoñ baa'd

to yuuñ lagā ki mujhe mil gayā na jaane kyā

vo chalte chalte achānak Thahar gayā 'tanhā'

havā ne kaan meñ us ke kahā na jaane kyā

meri ana ka taqaza hai kya na jaane kya

mere wujud se le jaega na jaane kya

hai tere shahr ki aab-o-hawa na jaane kya

koi to baat hai is mein juda na jaane kya

andhere raat ke kuchh aur ho gae gahre

lapak uTha tha kahin nur sa na jaane kya

mera hi chehra dikhane ke waste mujh ko

karega mujh se talab aaina na jaane kya

muhib KHamushi chhai hai shahr-andar-shahr

uDa ke le gai pagal hawa na jaane kya

azal hi se main sana-KHwan-e-nikhat-o-gul hun

hai mere waste baad-e-saba na jaane kya

bhare zamane ko dushman bana liya us ne

tamam 'umr wo karta raha na jaane kya

kabhi kabhi to wo KHud se bhi ho gaya munkir

kabhi kabhi to use ho gaya na jaane kya

KHud apne KHun mein KHanjar Dubo liya us ne

KHushi ka lamha use kar gaya na jaane kya

hui jo us se mulaqat aaj barson ba'd

to yun laga ki mujhe mil gaya na jaane kya

wo chalte chalte achanak Thahar gaya 'tanha'

hawa ne kan mein us ke kaha na jaane kya