meri ghazal se ghazal ki mahfil sajaane wala koi na hoga

mirī ġhazal se ġhazal kī mahfil sajāne vaalā koī na hogā

ye baat tai hai ki merī barsī manāne vaalā koī na hogā

varaq varaq āñsuoñ kā bistar bichhāne vaalā koī na hogā

ġhamoñ ko ġhazloñ ke pālne meñ sulāne vaalā koī na hogā

maiñ dil-burīda sā ek shā'ir huuñ merā dil band ho gayā to

qasam qalam kī dukhoñ kā mātam manāne vaalā koī na hogā

kabhī jo mujh sā haqīqatoñ kā payāmbar uTh gayā jahāñ se

ġhazal ke parde pe sach ke manzar dikhāne vaalā koī na hogā

jo is sadī meñ mirī ġhazal ko milī na tauqīr 'mīr' jaisī

to aglī sadiyoñ meñ ġhazleñ-vazleñ sunāne vaalā koī na hogā

maiñ ruuTh jā.ūñgā bazm-e-hastī kī raunaqoñ se to dekh lenā

gale se apne lagā ke mujh ko manāne vaalā koī na hogā

safed chādar ko oḌh kar ek raat so jā.uñgā maiñ aise

ki sub.h-dam is jahāñ meñ mujh ko jagāne vaalā koī na hogā

maiñ misl-e-bū-zar akelā ik dasht-e-be-kasī meñ marūñgā aur phir

chahār-jānib mirā janāza uThāne vaalā koī na hogā

mujhe yaqīñ hai maiñ baa'd marne ke kargasoñ kā shikam bharūñgā

zamīñ kī godī meñ merā lāsha chhupāne vaalā koī na hogā

maiñ jāntā huuñ ba-juz ḳhudā is jahāñ meñ merā koī nahīñ hai

maiñ jāntā huuñ ki merī turbat banāne vaalā koī na hogā

tamām rishte tamām naate maiñ zindagī meñ hī kho chukā huuñ

so merī mayyat pe chaar aañsū bahāne vaalā koī na hogā

ḳhudā ne jannat ke aaTh darje kiye haiñ taḳhlīq par ye sach hai

kisī meñ bhī ḳhilqat-e-ḳhudā ko satāne vaalā koī na hogā

tumhī batāo kahāñ se lāoge apne matbaḳh meñ maañ sī barkat

jab āyateñ paḌh ke ghar meñ chūlhā jalāne vaalā koī na hogā

vo aisā bad-baḳht hukmarāñ hai jise muhāfiz ye kah rahe haiñ

hameñ bachāo vagarna tum ko bachāne vaalā koī na hogā

ye pāniyoñ ke vabāl vīrān kar ke rakh deñge sāhiloñ ko

udaas dariyā meñ kashtiyoñ ko chalāne vaalā koī na hogā

jo barkhā-rut ne isī tarah se bahā diyā saarī bastiyoñ ko

to pyāsī dhartī pe megh-malhār gaane vaalā koī na hogā

ḳhudā-e-bartar mire kisānoñ ko ġharq hone se tū bachā le

vagarna ik din sunahrī gandum ugāne vaalā koī na hogā

samay bahut hai qarīb 'vāsif' maiñ aise ik des jā rahā huuñ

jahāñ pe apnā-parāyā mujh ko rulāne vaalā koī na hogā

meri ghazal se ghazal ki mahfil sajaane wala koi na hoga

ye baat tai hai ki meri barsi manane wala koi na hoga

waraq waraq aansuon ka bistar bichhane wala koi na hoga

ghamon ko ghazlon ke palne mein sulane wala koi na hoga

main dil-burida sa ek sha'ir hun mera dil band ho gaya to

qasam qalam ki dukhon ka matam manane wala koi na hoga

kabhi jo mujh sa haqiqaton ka payambar uTh gaya jahan se

ghazal ke parde pe sach ke manzar dikhane wala koi na hoga

jo is sadi mein meri ghazal ko mili na tauqir 'mir' jaisi

to agli sadiyon mein ghazlen-wazlen sunane wala koi na hoga

main ruTh jaunga bazm-e-hasti ki raunaqon se to dekh lena

gale se apne laga ke mujh ko manane wala koi na hoga

safed chadar ko oDh kar ek raat so jaunga main aise

ki subh-dam is jahan mein mujh ko jagane wala koi na hoga

main misl-e-bu-zar akela ek dasht-e-be-kasi mein marunga aur phir

chahaar-jaanib mera janaza uThane wala koi na hoga

mujhe yaqin hai main ba'd marne ke kargason ka shikam bharunga

zamin ki godi mein mera lasha chhupane wala koi na hoga

main jaanta hun ba-juz KHuda is jahan mein mera koi nahin hai

main jaanta hun ki meri turbat banane wala koi na hoga

tamam rishte tamam nate main zindagi mein hi kho chuka hun

so meri mayyat pe chaar aansu bahane wala koi na hoga

KHuda ne jannat ke aaTh darje kiye hain taKHliq par ye sach hai

kisi mein bhi KHilqat-e-KHuda ko satane wala koi na hoga

tumhi batao kahan se laoge apne matbaKH mein man si barkat

jab aayaten paDh ke ghar mein chulha jalane wala koi na hoga

wo aisa bad-baKHt hukmaran hai jise muhafiz ye kah rahe hain

hamein bachao wagarna tum ko bachane wala koi na hoga

ye paniyon ke wabaal viran kar ke rakh denge sahilon ko

udas dariya mein kashtiyon ko chalane wala koi na hoga

jo barkha-rut ne isi tarah se baha diya sari bastiyon ko

to pyasi dharti pe megh-malhaar gane wala koi na hoga

KHuda-e-bartar mere kisanon ko gharq hone se tu bacha le

wagarna ek din sunahri gandum ugane wala koi na hoga

samay bahut hai qarib 'wasif' main aise ek des ja raha hun

jahan pe apna-paraya mujh ko rulane wala koi na hoga