meri hayat ko yun paemal usne kiya

mirī hayāt ko yuuñ pā.emāl us ne kiyā

ki merā dard se rishta bahāl us ne kiyā

vo bevafā.ī ko kār-e-kamāl kahtā thā

phir ek roz ye kār-e-kamāl us ne kiyā

shikār-e-hijr mujhe kar gayā vo ik pal meñ

ki merī ziist ke pal-pal ko saal us ne kiyā

javāb koī bhī jab ban nahīñ sakā us se

mire savāl pe ulTā savāl us ne kiyā

chhurī ko tez bahut tez kar ke laayā vo

'ajīb Dhang se merā ḳhayāl us ne kiyā

'umair' us se farāvāniyāñ jo māñgīñ to

judā.iyoñ se mujhe mālā-māl us ne kiyā

meri hayat ko yun paemal us ne kiya

ki mera dard se rishta bahaal us ne kiya

wo bewafai ko kar-e-kamal kahta tha

phir ek roz ye kar-e-kamal us ne kiya

shikar-e-hijr mujhe kar gaya wo ek pal mein

ki meri zist ke pal-pal ko sal us ne kiya

jawab koi bhi jab ban nahin saka us se

mere sawal pe ulTa sawal us ne kiya

chhuri ko tez bahut tez kar ke laya wo

'ajib Dhang se mera KHayal us ne kiya

'umair' us se farawaniyan jo mangin to

judaiyon se mujhe mala-mal us ne kiya