meri hi samt baDhi barq-e-be-aman ki tarah

mirī hī samt baḌhī barq-e-be-amāñ kī tarah

na.ī bahār ne luuTā mujhe ḳhizāñ kī tarah

hamāre qāmat-e-bālā kā kyā ḳhizāñ kī tarah

zamīñ pe rahte haiñ ham log āsmāñ kī tarah

qafas ko chhoḌ deñ sayyād kī ye ḳhvāhish hai

qafas meñ rahne lage ham jo āshiyāñ kī tarah

kahāñ rahegā tumhāre ġhurūr kā aalam

fuġhāñ laboñ pe agar aa ga.ī fuġhāñ kī tarah

tumhāre husn kī ra.anā.iyāñ hamīñ se haiñ

miTāo ham ko na tum harf-e-dāstāñ kī tarah

ab aur pās-e-vafā is se baḌh ke kyā hogā

zabān rakhte hue ham haiñ be-zabāñ kī tarah

talāsh-e-manzil-e-maqsad se baaz ā.eñge

ubhar ke baiTheñge ham gard-e-kārvāñ kī tarah

chaman meñ barq kā qissa tamām ho jaa.e

ham āshiyāñ ko banā.eñ jo āshiyāñ kī tarah

karūñ adā maiñ ināyat kā shukriya kaise

baḌe ḳhulūs se milte ho rāz-dāñ kī tarah

pilā sako to pilāo ḳhulūs-o-rabt ke jaam

jo mil sako to milo ham se meherbāñ kī tarah

'vakīl' ek qadam apnā haT nahīñ saktā

jo imtihān-e-mohabbat ho imtihāñ kī tarah

meri hi samt baDhi barq-e-be-aman ki tarah

nai bahaar ne luTa mujhe KHizan ki tarah

hamare qamat-e-baala ka kya KHizan ki tarah

zamin pe rahte hain hum log aasman ki tarah

qafas ko chhoD den sayyaad ki ye KHwahish hai

qafas mein rahne lage hum jo aashiyan ki tarah

kahan rahega tumhaare ghurur ka aalam

fughan labon pe agar aa gai fughan ki tarah

tumhaare husn ki ranaiyan hamin se hain

miTao hum ko na tum harf-e-dastan ki tarah

ab aur pas-e-wafa is se baDh ke kya hoga

zaban rakhte hue hum hain be-zaban ki tarah

talash-e-manzil-e-maqsad se baz aaenge

ubhar ke baiThenge hum gard-e-karwan ki tarah

chaman mein barq ka qissa tamam ho jae

hum aashiyan ko banaen jo aashiyan ki tarah

karun ada main inayat ka shukriya kaise

baDe KHulus se milte ho raaz-dan ki tarah

pila sako to pilao KHulus-o-rabt ke jam

jo mil sako to milo hum se meherban ki tarah

'wakil' ek qadam apna haT nahin sakta

jo imtihan-e-mohabbat ho imtihan ki tarah