meri jaan judai na hogi to hogi

mirī jaañ judā.ī na hogī to hogī

kisī din laḌā.ī na hogī to hogī

unheñ sharm hai aur yahāñ shauq-e-behad

agar hāthā-pā.ī na hogī to hogī

nahīñ itnī jur.at ki qadmoñ pe girye

ki un se safā.ī na hogī to hogī

zarā jazba-e-dil madad kar ḳhudārā

jo un tak rasā.ī na hogī to hogī

na kuchh husn o ḳhūbī meñ farq aayā hogā

ye daulat luTā.ī na hogī to hogī

rihā.ī asīr-e-mohabbat ko tere

agar maut aa.ī na hogī to hogī

na.e zulm ījād karte raho tum

jahāñ meñ duhā.ī na hogī to hogī

nahīñ baak ġhairoñ se milne meñ un ko

jo dil meñ burā.ī na hogī to hogī

har ik baat par āfrīñ jab kaheñ sab

to phir ḳhud-satā.ī na hogī to hogī

mohabbat kī jo aañkh thī aage terī

jo tū ne churā.ī na hogī to hogī

mohabbat kā gar khul gayā haal un par

to 'anjum' rukhā.ī na hogī to hogī

meri jaan judai na hogi to hogi

kisi din laDai na hogi to hogi

unhen sharm hai aur yahan shauq-e-behad

agar hatha-pai na hogi to hogi

nahin itni jurat ki qadmon pe girye

ki un se safai na hogi to hogi

zara jazba-e-dil madad kar KHudara

jo un tak rasai na hogi to hogi

na kuchh husn o KHubi mein farq aaya hoga

ye daulat luTai na hogi to hogi

rihai asir-e-mohabbat ko tere

agar maut aai na hogi to hogi

nae zulm ijad karte raho tum

jahan mein duhai na hogi to hogi

nahin bak ghairon se milne mein un ko

jo dil mein burai na hogi to hogi

har ek baat par aafrin jab kahen sab

to phir KHud-satai na hogi to hogi

mohabbat ki jo aankh thi aage teri

jo tu ne churai na hogi to hogi

mohabbat ka gar khul gaya haal un par

to 'anjum' rukhai na hogi to hogi