meri jaanib nigah-e-naz kar aahista aahista

mirī jānib nigāh-e-nāz kar āhista āhista

mire dil ke jazīre meñ utar āhista āhista

mohabbat donoñ jānib hai tafāvut sirf itnā hai

idhar hai tez-rau lekin udhar āhista āhista

tirī beTī kā qad tere barābar ho gayā shāyad

tū apnī ḳhud-kushī par ġhaur kar āhista āhista

sahar aa.ī na aa.e vo sitāro jaao so jaao

ki ab chalte haiñ ham bhī apne ghar āhista āhista

jo kal tak merī barbādī kī qasmeñ khāte phirte the

vahī ab ho rahe haiñ dar-ba-dar āhista āhista

na jaane rah-ravān-e-rāh kā ab hashr kyā hogā

bhaTakte jā rahe haiñ rāhbar āhista āhista

ḳhudā ke vāste samjhā-bujhā kar rok le koī

vo dekho jā rahe haiñ ruuTh kar āhista āhista

adāvat dil meñ rakhnā muskurā kar guftugū karnā

sabhī ko aa gayā hai ye hunar āhista āhista

nimaT luuñ dostoñ kī dostī se pahle ai 'hamza'

to lūñgā dushmanoñ kī bhī ḳhabar āhista āhista

meri jaanib nigah-e-naz kar aahista aahista

mere dil ke jazire mein utar aahista aahista

mohabbat donon jaanib hai tafawut sirf itna hai

idhar hai tez-rau lekin udhar aahista aahista

teri beTi ka qad tere barabar ho gaya shayad

tu apni KHud-kushi par ghaur kar aahista aahista

sahar aai na aae wo sitaro jao so jao

ki ab chalte hain hum bhi apne ghar aahista aahista

jo kal tak meri barbaadi ki qasmen khate phirte the

wahi ab ho rahe hain dar-ba-dar aahista aahista

na jaane rah-rawan-e-rah ka ab hashr kya hoga

bhaTakte ja rahe hain rahbar aahista aahista

KHuda ke waste samjha-bujha kar rok le koi

wo dekho ja rahe hain ruTh kar aahista aahista

adawat dil mein rakhna muskura kar guftugu karna

sabhi ko aa gaya hai ye hunar aahista aahista

nimaT lun doston ki dosti se pahle ai 'hamza'

to lunga dushmanon ki bhi KHabar aahista aahista