meri KHamushi mein bhi eajaz aae

mirī ḳhāmushī meñ bhī e.ajāz aa.e

kahīñ se koī mujh ko āvāz aa.e

vo chehra na jaane kahāñ kho gayā hai

vo jis se lahū meñ tag-o-tāz aa.e

nikālā kisī ne na patthar se bāhar

mire shahr meñ roz but-sāz aa.e

uḌe niilī niilī ragoñ se nikal kar

mire dard meñ zauq-e-parvāz aa.e

sazā be-gunāhī kī maiñ kāTtī huuñ

mujhe zindagī ke na andāz aa.e

mohabbat ai dīvānī pāgal mohabbat

hameñ chhoḌ de dekh ham baaz aa.e

mirī tishna-kāmī savālī hai jis kī

kabhī to vo 'naināñ' ba-sad-nāz aa.e

meri KHamushi mein bhi eajaz aae

kahin se koi mujh ko aawaz aae

wo chehra na jaane kahan kho gaya hai

wo jis se lahu mein tag-o-taz aae

nikala kisi ne na patthar se bahar

mere shahr mein roz but-saz aae

uDe nili nili ragon se nikal kar

mere dard mein zauq-e-parwaz aae

saza be-gunahi ki main kaTti hun

mujhe zindagi ke na andaz aae

mohabbat ai diwani pagal mohabbat

hamein chhoD de dekh hum baz aae

meri tishna-kaami sawali hai jis ki

kabhi to wo 'nainan' ba-sad-naz aae