meri manzilen zara dur thin mera rasta na thaka magar

mirī manzileñ zarā duur thiiñ mirā rāstā na thakā magar

baḌī saḳht thī ye musāfirat mirā ham-safar thā bhalā magar

mirī be-ruḳhī ko ai bevafā na adāvatoñ kā tū naam de

mirī chāhatoñ meñ kamī nahīñ mujhe tujh se kuchh hai gila magar

ye navāzisheñ mire yaar kī isī zaḳhm-e-dil ke sabab se haiñ

yuuñ ayādatoñ ko to aa.eñ sab mujhe de na koī davā magar

mirī raushnī ko miTā gayā vo jo jaate jaate bujhā gayā

mirā dil jalā mirā ghar jalā vo charāġh phir na jalā magar

kabhī charḳh us ko junūñ mile mire dil ko bhī to sukūñ mile

use ārzū-e-karam to ho mire lab pe ho na duā magar

mire ham-safar usī moḌ par tirā haath hai mujhe chhoḌnā

mirī manzileñ to vahīñ hai sab mirā rāstā hai judā magar

mire naam par jo haiñ tohmateñ mire sāmne bhī lagā kabhī

tire jhuuT ko bhī maiñ sach kahūñ tū nazar nazar se milā magar

kabhī is tarah bhī mile the ham ki laboñ pe harf-e-gila na thā

use shāyad ab ke na yaad ho kabhī us ne kī thī vafā magar

tirī baat maiñ ne ye maan lī maiñ nahīñ huuñ tere ḳhayāl meñ

mirā zikr jis meñ huā na ho mujhe vo ġhazal to sunā magar

mujhe koī tujh se gila na ho tirī chiiz hai tirā iḳhtiyār

use ġhair ko tū zarūr de mirā naam dil se miTā magar

meri manzilen zara dur thin mera rasta na thaka magar

baDi saKHt thi ye musafirat mera ham-safar tha bhala magar

meri be-ruKHi ko ai bewafa na adawaton ka tu nam de

meri chahaton mein kami nahin mujhe tujh se kuchh hai gila magar

ye nawazishen mere yar ki isi zaKHm-e-dil ke sabab se hain

yun ayaadaton ko to aaen sab mujhe de na koi dawa magar

meri raushni ko miTa gaya wo jo jate jate bujha gaya

mera dil jala mera ghar jala wo charagh phir na jala magar

kabhi charKH us ko junun mile mere dil ko bhi to sukun mile

use aarzu-e-karam to ho mere lab pe ho na dua magar

mere ham-safar usi moD par tera hath hai mujhe chhoDna

meri manzilen to wahin hai sab mera rasta hai juda magar

mere nam par jo hain tohmaten mere samne bhi laga kabhi

tere jhuT ko bhi main sach kahun tu nazar nazar se mila magar

kabhi is tarah bhi mile the hum ki labon pe harf-e-gila na tha

use shayad ab ke na yaad ho kabhi us ne ki thi wafa magar

teri baat main ne ye man li main nahin hun tere KHayal mein

mera zikr jis mein hua na ho mujhe wo ghazal to suna magar

mujhe koi tujh se gila na ho teri chiz hai tera iKHtiyar

use ghair ko tu zarur de mera nam dil se miTa magar