meri mohabbaton ka tir us pe chal nahin raha

mirī mohabbatoñ kā tiir us pe chal nahīñ rahā

jalā rahā huuñ maiñ magar charāġh jal nahīñ rahā

ye aur sāniha hai jo malūl ho rahā huuñ maiñ

tumhāre chhoḌ jaane par maiñ haath mal nahīñ rahā

nikal ke aa gayā huuñ tere shahr-e-nā-murād se

magar tirā ḳhayāl zehn se nikal nahīñ rahā

ki us kī yaad pahle bhī to roz aatī thī mujhe

na jaane aaj kyoñ magar ye dil sañbhal nahīñ rahā

milegā aaj shaam vo kiyā hai vā'da us ne aur

sitam ye dekhiye ki āftāb Dhal nahīñ rahā

vo āñkheñ bujh ga.ī haiñ ab vo hoñT ḳhushk ho ga.e

mirī udāsiyoñ kā ab koī bhī hal nahīñ rahā

ki sūq-e-chashm meñ miyāñ vo raunaqeñ nahīñ rahīñ

ki muddateñ huiiñ yahāñ pe kaam chal nahīñ rahā

so us pe kyā ġhazal likheñ vo husn ab to Dhal gayā

so us shajar pe baat kyā vo jis pe phal nahīñ rahā

hazār harbe āzmā.e us ke vāste 'doraib'

ḳhayāl haif koī bhī magar saphal nahīñ rahā

meri mohabbaton ka tir us pe chal nahin raha

jala raha hun main magar charagh jal nahin raha

ye aur saniha hai jo malul ho raha hun main

tumhaare chhoD jaane par main hath mal nahin raha

nikal ke aa gaya hun tere shahr-e-na-murad se

magar tera KHayal zehn se nikal nahin raha

ki us ki yaad pahle bhi to roz aati thi mujhe

na jaane aaj kyon magar ye dil sanbhal nahin raha

milega aaj sham wo kiya hai wa'da us ne aur

sitam ye dekhiye ki aaftab Dhal nahin raha

wo aankhen bujh gai hain ab wo honT KHushk ho gae

meri udasiyon ka ab koi bhi hal nahin raha

ki suq-e-chashm mein miyan wo raunaqen nahin rahin

ki muddaten huin yahan pe kaam chal nahin raha

so us pe kya ghazal likhen wo husn ab to Dhal gaya

so us shajar pe baat kya wo jis pe phal nahin raha

hazar harbe aazmae us ke waste 'doraib'

KHayal haif koi bhi magar saphal nahin raha