meri muTThi mein miTTi hai mohabbat ki

mirī muTThī meñ miTTī hai mohabbat kī

ye daulat kā.enātī hai mohabbat kī

maiñ patthar ko badal detā huuñ resham meñ

mire hāthoñ meñ narmī hai mohabbat kī

tumheñ dekhūñ to nafrat se nahīñ fursat

mujhe dekho to jaldī hai mohabbat kī

charāġh-e-dil kabhī bujhtā nahīñ merā

mizāj-e-ḳhūñ meñ garmī hai mohabbat kī

rag-o-pai meñ utartā hai ajab nashsha

tirī āñkhoñ meñ mastī hai mohabbat kī

isī meñ hai hamārī sarḳhushī āḳhir

ise thāmo ye rassī hai mohabbat kī

nahīñ hai tursh us kā zā.iqa 'shāhid'

bahut mīThī ye imlī hai mohabbat kī

meri muTThi mein miTTi hai mohabbat ki

ye daulat kaenati hai mohabbat ki

main patthar ko badal deta hun resham mein

mere hathon mein narmi hai mohabbat ki

tumhein dekhun to nafrat se nahin fursat

mujhe dekho to jaldi hai mohabbat ki

charagh-e-dil kabhi bujhta nahin mera

mizaj-e-KHun mein garmi hai mohabbat ki

rag-o-pai mein utarta hai ajab nashsha

teri aankhon mein masti hai mohabbat ki

isi mein hai hamari sarKHushi aaKHir

ise thamo ye rassi hai mohabbat ki

nahin hai tursh us ka zaiqa 'shahid'

bahut miThi ye imli hai mohabbat ki