meri nazar ka nahin mere dil ka dhoka tha

mirī nazar kā nahīñ mere dil kā dhokā thā

vo to nahīñ thā koī aur tere jaisā thā

jo chhan se Tuut gayā kyā thā dekhnā hogā

vo ḳhvāb thā ki mirā dil ki koī shīsha thā

amiir log ḳharīdār ban ke aa.e the

mujhe kisī ne ḳharīdā nahīñ ki sastā thā

siyāh chashme ke pīchhe se maiñ ne sab dekhā

tamām log samajhte rahe maiñ andhā thā

samajh meñ aa.ī hai ab jā ke us ko qadr mirī

usī ne mujh ko ḳharīdā ki jis ne bechā thā

zamīñ pe aaj talak maiñ pahuñch nahīñ paayā

kisī ne itnī bulandī se mujh ko pheñkā thā

kuchh aur samjhā gayā us ke har ishāre ko

gavāh qatl kā mere 'kamāl' gūñgā thā

meri nazar ka nahin mere dil ka dhoka tha

wo to nahin tha koi aur tere jaisa tha

jo chhan se Tut gaya kya tha dekhna hoga

wo KHwab tha ki mera dil ki koi shisha tha

amir log KHaridar ban ke aae the

mujhe kisi ne KHarida nahin ki sasta tha

siyah chashme ke pichhe se main ne sab dekha

tamam log samajhte rahe main andha tha

samajh mein aai hai ab ja ke us ko qadr meri

usi ne mujh ko KHarida ki jis ne becha tha

zamin pe aaj talak main pahunch nahin paya

kisi ne itni bulandi se mujh ko phenka tha

kuchh aur samjha gaya us ke har ishaare ko

gawah qatl ka mere 'kamal' gunga tha