meri nazar ka sharar apna kaam karne laga

mirī nazar kā sharar apnā kaam karne lagā

bujhā charāġh mire dekhne se jalne lagā

zarā sī raushnī uTThī thī mere pahlū se

phir ek saaya mire saath saath chalne lagā

ye jis tarah se dikhātā hai ḳhāl-o-ḳhad mere

mirā vujūd tire aa.ine se Darne lagā

vahī nishāñ jo mujhe khīñchtā thā apnī taraf

maiñ chal paḌā to vo apnī jagah badalne lagā

azal abad ke kināroñ meñ khīñchā-tānī huī

ridā-e-vaqt pe jab merā haath paḌne lagā

'uzair' chhoḌ ke merī ghaḌī kalā.ī par

mirā ye vaqt mire haath se phisalne lagā

meri nazar ka sharar apna kaam karne laga

bujha charagh mere dekhne se jalne laga

zara si raushni uTThi thi mere pahlu se

phir ek saya mere sath sath chalne laga

ye jis tarah se dikhata hai KHal-o-KHad mere

mera wujud tere aaine se Darne laga

wahi nishan jo mujhe khinchta tha apni taraf

main chal paDa to wo apni jagah badalne laga

azal abad ke kinaron mein khincha-tani hui

rida-e-waqt pe jab mera hath paDne laga

'uzair' chhoD ke meri ghaDi kalai par

mera ye waqt mere hath se phisalne laga