meri nazar mein to lafz-e-ulfat KHizan bhi hai aur bahaar bhi hai

mirī nazar meñ to lafz-e-ulfat ḳhizāñ bhī hai aur bahār bhī hai

ye raas aa.e to phuul bhī hai na raas aa.e to ḳhaar bhī hai

badalte mausam kī tarah se jo badal gayā mujh ko apnā kah kar

usī sitam-gar se phir bhī mujh ko ajab to ye hai ki pyaar bhī hai

ye husn bhī hai ajab tamāsha kabhī hañsā.e kabhī rulā.e

yahī diloñ kā sukūn chhīne yahī diloñ kā qarār bhī hai

ye Dar hai mujh ko tirā taġhāful kahīñ na be maut maar Daale

ye be-niyāzī ye jhūTe va.ade tire sitam kā shumār bhī hai

vo jhuuT bole to sach maiñ samjhūñ fareb us kā ḳhulūs jānūñ

jo fitna-gar hai mujhe usī kā na jaane kyoñ e.atibār bhī hai

vo jis ne āñkhoñ ko ashk baḳhshe vo jis ne dil ko malāl baḳhshā

usī ne mujh ko kiyā hai rusvā ki jo mirā rāzdār bhī hai

yahī to hai raunaq-e-gulistāñ na toḌ shāḳhoñ se phuul maalī

inhīñ ke dam se chaman chaman hai inhīñ se rang-e-bahār bhī hai

ye ishq vo rāh-e-pur-ḳhatar hai ki jis se bas ahl-e-dil hī guzreñ

haiñ ḳhaar hī ḳhaar har qadam par magar yahī lāla-zār bhī hai

na aa.egā duur jaane vaalā 'zafar' maiñ ye baat jāntā huuñ

nahīñ hai ummīd vāpsī kī magar mujhe intizār bhī hai

meri nazar mein to lafz-e-ulfat KHizan bhi hai aur bahaar bhi hai

ye ras aae to phul bhi hai na ras aae to KHar bhi hai

badalte mausam ki tarah se jo badal gaya mujh ko apna kah kar

usi sitam-gar se phir bhi mujh ko ajab to ye hai ki pyar bhi hai

ye husn bhi hai ajab tamasha kabhi hansae kabhi rulae

yahi dilon ka sukun chhine yahi dilon ka qarar bhi hai

ye Dar hai mujh ko tera taghaful kahin na be maut mar Dale

ye be-niyazi ye jhuTe wade tere sitam ka shumar bhi hai

wo jhuT bole to sach main samjhun fareb us ka KHulus jaanun

jo fitna-gar hai mujhe usi ka na jaane kyon eatibar bhi hai

wo jis ne aankhon ko ashk baKHshe wo jis ne dil ko malal baKHsha

usi ne mujh ko kiya hai ruswa ki jo mera raazdar bhi hai

yahi to hai raunaq-e-gulistan na toD shaKHon se phul mali

inhin ke dam se chaman chaman hai inhin se rang-e-bahaar bhi hai

ye ishq wo rah-e-pur-KHatar hai ki jis se bas ahl-e-dil hi guzren

hain KHar hi KHar har qadam par magar yahi lala-zar bhi hai

na aaega dur jaane wala 'zafar' main ye baat jaanta hun

nahin hai ummid wapsi ki magar mujhe intizar bhi hai